Rauthla, March 29, 2022 : Hun rei tak sawizawm ni tawh Barcelona chuan Leeds forward Raphinha chu Camp Nou-ah lakluh tumin thapui thahleh an tum mek.
Barcelona hian Raphinha lak tum hian Leeds hi €35m kengin vawi khat an dawr tawh a, hei hi Leeds lam hian lo hnarin Raphinha chu €50m man a ni thu an sawi a. Barcelona hi an beidawng mai lova, an boss Xavi hian Raphinha hi a duh em avangin an sum phut zat kengin an dawr tha leh dawn. A man atan a Leeds in an chhiar €50m hi vawkhatah pe tla lovin, vawikhatah €40m pek phawt a, a hnuah €10m pek leh an tum a ni. Raphinha agent hi Deco a ni a, Barcelona nen an intitha hle niin an sawi a, hei vang hian Barca hian Brazilian forward hi lakluh theih mai an in beisei a. Thenkhat chuan kum nga chhung atan mimal inremna an nei tawh an ti bawk.
Football transfer thuthang hre em em Fabrizio Romano chuan Raphinha hian Leeds-ah hian release clause pahnih a nei tih a sawi a. A pakhatna chu, Leeds hi Championship lamah an tlak chuan Raphinha hi €25m in hralh ang. Tunah hian Leeds hi EPL ah point 29 nei mekin 16-naah an awm a, 18-na Watford aiin point 7 chiahin an sang. Pahnihna chu, Leeds hi Premier League-ah an inhamtang a nih chuan Raphinha hian release clause €75m a nei dawn a ni.
Brazilian forward kum 25 mi Raphinha hian October 2022 khan Leeds United hi a zawm a, The Whites tan hian match 57 khel tawhin goal 15 a khung mek bawk. Kum 2024 thleng Leeds United-ah hian contract a la nei bawk a ni.
Post a Comment