Lawngtlai, March 30, 2022 : Vawiin March 30, 2022 khan Lai Autonomous District Council Budget Sesssion chu Chairman Pu VL Hmuaka kaihhruaina hnuaia neih chhunzawm leh a ni.

Vawiin session-ah hian Pu C. Lalmuanthanga, South Lungpher bialtu MDC zawhna chhangin Pu V. Zirsanga, CEM, LADC chuan August 2021 hnu lamah LADC Staff pension 10 an awm thu a sawi a, heng pension post ruakte hi a then mithara hnawhkhah a ni a, a thente chu rawih nawn an ni a, a then chu promotion hmanga hnawhkhah te a nih thu a sawi a. Hetih lai hian Sangau RO pension ta S. Rammawia leh Voluntary pension-a chhuak ta Pu Zirkima post ruakte chu hnawh khah a la ni lo tih a sawi bawk.

Pu V. Zirsanga chuan LADC Officer pension an awm nual thu a sawi a, post ruak pawh a awm nual a ti a, hei hi Governor hnenah heng post ruak hnawh khahna tur hi dil tum a ni a, a remtih chuan direct-a advertisement te chhuahin hna hi lak tum a ni a ti.

Pu C. Lalmuanthanga chuan zawh belhin 'Executive committee hmasa leh tun ministry executive committee-ah re-employment siam tawh lo turin committee-ah rel a ni a, tunah re-employment a awm leh a, hei hi LSA te enghelh ber pawh a ni' a ti.

Pu V. Zirsanga chuan 'Executive Committee-ah LADC hnuaia thawk pension te service extend tawh loh nise tiin a rel a, tumah extend sak an awm lo. A sawifiahnaah CEM chuan service extension-ah chuan service an enjoy-a kha a hnuaia subordinate officer-te tan pawha promotion break vek a ni a, hei vang hian LADC leh a hnuai thawkte tan tawrhna nasa tak a ni a, LADC Executive Committee chuan service extension hi a titawp a ni' a ti. Pu V. Zirsanga chuan Executive Secretary pension ta, Pu H. Lalramenga an rawih nawn chungchang sawiin, 'Executive Secretary bikah chuan hun kal tawh zawng zawngte kan ngaihtuah a, midang zawng zawng an extend laia a ni pension chhuak hlim extend lova awm chu kan top official a nih avang leh hun lo la kal zel turah midangte pawhin an thik theih rual loh turah kan ngai a, zahna kan lantir nan leh a phu kan tih avangin a service pawhsei sak hi tihawm tak a ni a, remchang kan zawng a, re-employ ti zawngin thla ruk atan kan chhawr nawn a ni a ti. CEM chuan re-employment-ah chuan a hnuaia subordinate hoin an qualifying service in a tlin a nih chuan promotion pek theih a ni a, re-employ an nih hian ES a nih anga mimal hamthatna a dawn ang thin chu a hmu/dawng tawh dawn lo' tih a sawi lang bawk. 

Post a Comment

Powered by Blogger.