Lungtian, February 11, 2022 : Vawiin, February 11, 2022 khan Lawngtlai East bialtu MLA Pu H. Biakzaua chuan Lungtianah cheng nuai 18 senga sak thar Rural Animal Health Centre (RAHC) Office building a hawng. 



Pu H. Biakzaua, MLA, Vice Chairman, Agriculture Development Board, Gov't of Mizoram chuan Mizoram Chief Minister zahawm tak Pu Zoramthanga leh Vety Minister Dr. K. Beichhua te hmalakna leh duhsakna a zara Lungtian khuain Rural Animal Health Centre an nei thei chu lawmawm a tih thu sawiin, Lungtian leh a bulhnai khuaa ranvulhtu ten ṭangkai taka an hman a beisei thu a sawi a. Vawk chhul lak leh Til lakna kawnga harsatna an neih pawh tunah chuan phuhrukin a awm tawh dawn a ni a ti.

MLA Pu H. Biakzaua chuan SEDP MNF Party Flagship Programme-ah Vawk vulh Trade hi dah a nih tur thu sawiin, Vawk no a sem lovin a pawisa faia an sem tur thu a sawi bawk. Lungtian khuaa AH & Vety Sub-Centre chu tangkai tak a hman a nih theih nan thawktu pawh dah nghal a ni a ti bawk.

He Rural Animal Health Centre Office building thar hawnna inkhawm hi Dr. Thanseia Chhangte District AH&VO (District Animal Husbandry & Veterinary Officer) Lawngtlaiin a kaihruai a, Rev. C. Lalengkima'n hunserh a hmang. Pu H. Biakzaua MLA hi Pu CL. Lianzuala, Dy. Chairman, LADC, Pu Sanghuliana Mualchin, Chairman, Town Committee, LADC, Pu K. Hre Kung MDC leh Pu H. Lalramfawna, MDC ten an tawiawm a ni.

He Rural Animal Health Centre Office Building hi Lungtian-I khawchhung kawngpui bulah sak niin cheng nuai 18 senga sak a ni.

Lawngtlai East bialtu MLA hian Lungtian Godown sak ṭhat mek pawh a hmunah kalin an hnathawh dan hrang hrangte a en nghal bawk a ni.


Post a Comment

Powered by Blogger.