Aizawl, February 16, 2022 : Health Minister Dr. R. Lalthanglianan Mizoramah COVID19 hrik thar Omicron hmuh anih tak avangin Mizoram Government Doctors Association leh Indian Medical Association lamin inenkawl dan thar, treatment protocol an buatsaih a ngai dawn, a ti.
He thu hi nimina Aizawla Civil Hospital-a MJA member te tana Free Health Check-up buatsaih hmawr bawkna a hmanpuinaah a sawi a. Health Minister chuan tunhnai maiah COVID 19 Omicron Variant Mizoram atanga sample thawnah 62 lai hmuhchhuah a nih thu a sawi a, hei vang hian inenkawl dan thar an buatsaih a ngaih tur thu a sawi a ni.
Minister chuan Doctor, Nurse leh Health Worker indaih lohna te sawiin, thingtlanga thawk tur Doctor contract a lak mai tur an awm lo chu pawi a tih thu sawiin tuna thawk mekte chuan theih tawp chhuah zel turin a chah a ni.
Nimina Free Health Check up kharnaah hian Dr. R. Lalthangliana chuan MJA te chu Mizoram-in COVID -19 a hmachhawn kawnga tanpuitu pawimawh takte an nih thu sawiin lawmthu a sawi a. An hriselna te ngai pawimawha uluk taka inenkawl zel turin a chah a ni.
Nimin vek khan Lunglei Civil Hospital-ah MJA member te tan Free Health Check-up buatsaih a nih thu sawiin Minister chuan District hrang hranga MJA member te tan an awmna district a Sawrkar Hospital-ah Free Health Check-up an neih theih na turin ruahmanna siam ni se a ti a. Minister hian MJA ten an Golden Jubilee lawmnan cheng nuai khat pek a tiam bawk a ni.
MJA President Pu Zonunsanga Khiangte pawhin thu sawiin, Civil Hospital-a thawktute chungah an member te tana Free Health Check-up an neih sak thin avangin lawmthu a sawi a ni. Free Health Check-up-ah hian MJA member 50 vel ten tun thla ni 8 atanga ni 15 chhung khan test leh investigation hrang hrang an lo nei tawh a. Hetianga MJA tana Free Health check up hi kum 2010 atang khan Civil Hospital hian a lo buatsaih thin tawh a ni.
Post a Comment