Rauthla, November 29, 2021 : Mizo zinga thu ziaktu hriat hlawh tak Manipur atanga Indian Foreign Service (IFS) Officer hmasa ber Pu Lalthlamuong Keivom, chu nimin zing khan Delhi-ah a thi. Kum 82 a ni.
Pu L. Keivom hi Manipur-a Pherzawl khuaah July ni 15, 1939 khan a piang a, unau 13 zinga a naupang ber a ni. An khua Pherzawl-ah High School thleng a zir a, Imphal DM College-ah B.A (English Honours) a zo a; Gauhati University hnuaiah MA (History) a zo leh a. Kum 1966-67 khan Sialmat Christian College-ah Lecturer ni chungin kum 1967 atanga 1970 thleng Indian Customs and Central Excise Service a zawm a, kum 1970 khan Indian Foreign Service (IFS)-ah a inziak tling leh a, ram hrang hrangah India ram tana palai hna pawimawh tak tak a chelh kual hnuah pension-in Delhi-ah a inbengbel zui a ni.
Pu L. Keivom hi thu leh hla lama tui mi a ni a, lehkhabu eng emaw zat a ziah zingah Zoram Khawvel-1 chu Mizo Acadamy of Letters (MAL)-in Book of the year-ah a thlang a ni.
Pu L. Keivom hi kumin June ni 25-a a zing tho chu a chauh deuh avangin Doctor an rawn a, thisen nei tam tawk lo leh Pneumonia natna nei a ni tih hmuhchhuah a ni a, hemi hnu hian a rilpui, a thin, a chuap leh a pumpui-ah Cancer a nei tih hmuhchhuah leh a ni a, damdawi inah leh ama inah theihtawpa enkawl zui a nih hnuin a natna hi zual zelin nimin zing dar 5:46 khan a thi ta a ni. A fate hi ram pawna awm an nih avangin naktuk Thawhlehni-ah vui tum a ni.
Post a Comment