Hri leng avangin hun eng emaw chen chu Kohhran te pawhin Biak In hawngin kan inkhawm thei lova. Inkaihhruaina thlahdul hret hret a ni a, Pathianni zing inkhawm phal a ni a. Tunah chuan zan lam pawh inkhawm phalsak kan ni ve ta. Nimahsela, Kohhran inkhawmah erawh zai erawh an la phal ta rih lova. Kohhran te’n sorkar thuchhuah pawh kan la zawm tha hle niin a lang.
Sorkarin Inkhawmna ah zai an rem ti lova, nimahsela sorkar function-ah erawh an zai a, an lam mup mup si a, tiin sorkar kan sel a. Mipui te’n sorkar kan selna pawh hi a dik viau mai. Mal zai pangngai erawh tumahin an sel lem lo. Mahse, tun tum Anthurium Festival zet zawng dan siamtu ten an dan siam an theihnghilh ta emaw tih theih turin, an lam suau suau mai si a. Chu chuan sorkarin a dan siam pawh a zawm lo tiin kan sawi ta chiam mai a ni.
Dan siam hi a awlsam a, a zawm erawh kan harsat tlang tih a hriat hle mai. Mahse, kohhran erawh vawiin thlengin lo tisual ve deuh awm mahse, sorkar dan siam a zawm tha ber an ni lawi si a ni. Tunah pawh sorkarin Biak In ah zai phal loh tih a ni a, kohhran hruaitu thenkhatte chuan zai an chak viau mai. Sorkar pawhin a dan siam a bawhchhia a, keini ho chu Pathian fak tur kan ni a lawm, tiin lo zai ta pawh ni ila, tisual ah kan inngai kher lovang. Mahse, Kohhran tal hi chuan sorkar dan siam kan zawm hi a Kristian a, Pathian ringtu kan nihna hi kan tihlanna hmun leh hun tur tak a ni zawk dawn lawm ni. Sorkarin dan a siam bawhchhe zawngin kal mahse, kohhran tal hi chuan i bawhchhe lo hram hram ang u.
Post a Comment