Siaha, October 27, 2021 : October ni 25, 2021 Thawhtanni zana Siaha District Jail atanga tlan chhuak mi 4 te chu tukin dar 9:45 vel khan Lunglei Police ten Theiriat bul, Hminlokawn ah an man.
Siaha District Jail atanga tlanchhuakte hi a hnuaia mite hi an ni.
1. Vanlalmalsawma @ Ramuka (SI Convict), S/o Chhanerha, Sangau, Gr. no. 50/20 U/s 457/380 IPC
2. Vanlalchhanchhuaha (UTP) S/o Thathuan, Champhai, Gr.No.01/20 U/s 21 (b) ND&PS
3. Vanrampana @Sabjoys (SI Convict) S/o K. Sanga, Meisatla Siaha, Gr. no. 39/40/2021 U/s 380/380/244 IPC
4. SD Khuma (UTP) S/o Sawithuama, Kawlchaw West, Gr.no.18/2019 U/s 21 (b) ND&PS
Kan thudawnna in a sawi danin, Lunglei Police te hian an thu hriat ruk bawhzuiin heng mite hi an lo chang a. Hminlokawnah Vai truck te lo enfiahin, Truck pakhatah Jail tang tlanchhuak pakhat hi an man a. A thiante hi an scooty ruk ah inphurin an man zui nghal bawk a ni.
Siaha District Jail thuneitute chuan tang tlanchhuak zinga pathum hi Covid-19 hrikaite dahna ward atangin an chhuak a, pakhat hi Quarantine Ward atanga tlanchhuak a ni. Siaha Police Station OC hnen atanga Rauthla thu dawn danin, heng tang tlan chhuakte hian an ward awmna bar pakhat tichhhiin, fencing zawh phei zelin duty tower awmlohna zawnah put thlain, fencing kuaikauin an chhuak ta a ni. Siaha OC chuan, hemi zan hian tang tlanchhuakte hian Zero ah Scooty pahnih ruin Lawngtlai lamah an tlan phei tih a sawi a, Lawngtlaiah hian an scooty ruk thar zawk chu an hralh tih a sawi bawk. Ramuka leh a thianpa hian scooty pakhat hmangin Lunglei an pan a, a dang pahnih hi Truck-ah an chuang niin a sawi. Hemi zan hian Lawngtlaiah Vai dawr rawk a ni a, a rawktute hi anmahni tho a nih an rin thu a sawi bawk.
Siaha OC chuan heng tang tlanchhuakte hi Siaha Jail lamah laklet tur a nih thu a sawi a, a hruai turin ruahmanna siam mek a ni a ti.
Tang tlanchhuak an man te hi Covid-19 hri an kai leh kai loh endik niin, hri an kai tih hmuhchhuah a ni.
Post a Comment