Rauthla, October 09, 2021 : Mizoram State Commission for Protection of Child Rights chuan rawngbawltu James Lalramliana, thil duhawm lo tak tia puh a nih chungchangah a tuartu naupang nia sawi nihna tilang thei tur leh a nihna chhuizawn theih tur tidarh an awma an hriat thu leh Commission-in a chhui zui tur thu a sawi.



MSCPCR chairman Dr C Lalsangzuala chuan nimin khan a pisa-ah thuthar thehdarhtu ṭhenkhatte kawmin, tun hnaia James Lalramliana khaw pakhata a chet dan duhawm loh tak hriat chhuah a nih thu sawiin, "Darlawn PS-ah FIR thehluh a ni a, James-a Aizawlah a chhuk hman avangin Aizawl PS lamah kan thlen a, anni'n rang takin an man a ni," a ti a, Darlawn PS-a thawktute pawh an FIR dawn bawhzuiin Aizawlah an kal nghal vat thu a sawi.


Dr C Lalsangzuala chuan James Lalramliana chu POCSO Act section 6 hmanga thubuai siam sak a nih thu sawiin, "Thiam loh chantir a nih chuan a tlem berah kum 10 emaw, dam chhung emaw jail tang tura hrem theih a ni," a ti.


Vanduaina tawk hmeichhe naupang chu Aizawl District Child Protection Unit-te'n hmun himah dahin, thlamuang taka a awm tawh thu sawiin, MSCPCR Chairman chuan, "A tuartu naupang hi kan ngaihven ber pakhat a ni a, nunphung pangngaia a nun leh hi kan duh ber a ni. JJ Act chuan naupang vanduaina tawkte miin an hriatzui theihna tur vawrhdarh a ngai thutak hle," a ti a, hetiang tite chu thla ruk chhung jail tan emaw, cheng nuai hnih chawi emaw, a pahniha hrem theih an nih thu a sawi.


Tun hnaia thil thlengah van­duaina tawk hriatzui theih tur zawnga thil ti an awma an hriat thu sawiin Dr C Lalsangzuala chuan, "A ṭul angin kan chhui zui ang a, hma kan la dawn a ni. Hemi kawngah hian Social media lam khawihtute an inven a ngai hle," a ti.


MSCPCR Chairman chuan revival crusade leh camping-te kan la neih zel a rinawm thu sawiin "Naupangte zawkte'n rawng­bawltute hi an hmu hmelṭha nghal fo a ni. Chuvangin fimkhur a ngai," a ti a; revival crusade leh camping buatsaih a nih dawnin kohhran committee-te'n naupangte himna ngaihtuahtu committee din ṭhin se an duh thu a sawi. 

Post a Comment

Powered by Blogger.