Siaha, October 26, 2021 : Mara Student’s Organistion, General Hqrs., Siaha ten MADC in kum 2020-2021 inkar advertisement chhuah lova hna an lak ban vek tura MADC sorkar an ngenna chu MADC chuan tihhlawhtlin a remti a, inremna an siam.
MSO, Gen. Hqrs., Siaha chuan MADC hian kum 2020 leh kum 2021 chhung khan advertisement chhuah lovin hna nghet an la nasa tih a sawi a, hei hi MSO hian tha ti lovin September 27, 2021 leh October 14, 2021 khan heng hna an lak lo te hi ban turin CEM Pu N. Zakhaia hnenah lehkha an thehlut a, MADC sorkar hian an hna lak engemawzat chu chawlh tir mahse an duh khawp a la ni lo tih an sawi. Hei vang hian MADC sorkarin heng advertisement chhuah lova hna an lakte ban turin leh hna lak list pe tur hian MADC sorkar lakah lungawilohna lantir nan October 21, 2021 leh October 22, 2021 khan MADC office kawtah picketing an nei.
MADC leh MSO ten inremna an siam dan chuan kum 2020-2021 chhunga MADC in advertisement chhuah lova hna an lak zawng zawngte chu an ban vek nghal a, hetah hian level 3 hnuai lam erawh an tel lo. Tin, nikum atanga kumin October thla thlenga MADC hna an lak zawng zawng list chu MSO an pek dawn bakah Level 4 chunglam hna lak reng reng advertisement kaltlang veka lak tawh tur a ni.
MSO leh MADC inremna turah hian MTP leh ECM ten tha an thawh nasa hle tih MSO Gen. Secretary Jephtha Hudson chuan a sawi a, an chungah lawmthu a sawi bawk a ni.
Post a Comment