Lawngtlai, October 27, 2021 : Lawngtlai Diatrict Sports Committee hruaitute chuan nimin khan an Adviser Pu C. Hrangthianga, EM Sports & Youth Services changtu ni bawk chu a office-ah lengin lawmpuina hun an hmanpui.
Lawmpuina hun kaihhruaitu LDSC chairman Pu N. Lalramriliana chuan, LDSC chhungkua zingah Lairam rorelna sang bera dinhmun pawimawh taka ding an awm chu lawmawm a tih thu sawiin, LDSC chuan thinlung takin Pu C. Hrangthianga chu an lawmpui thu a sawi.
Pu C. Hrangthianga, Adviser LDSC leh EM, I/c Sports & Youth LADC ni bawk chuan, LDSC ten ram rorelna Dawhkan a kil hnua lawmpuina hun an buatsaih sak chu lawmawm a tih thu sawiin, LDSC a a awm laia an hmalaknate chuan kan ram Infiamna chawisanna kawngah rah a chhuak mek zel tih a sawi bawk. Pu C. Hrangthianga chuan, LADC hnuaia SYS Dept. leh LDSC chu hmalam hunah pawh theihtawp chhuaha thawkho zel turin LDSC Hruaitute chu a sawm bawk.
Pu Matthews R. Laldinpuia, Secretary LDSC chuan LDSC enkawlna hnuaiah Disciplines 14 an awm mek thu tarlangin, Mizoram State Sports Council enkawlna hnuaiah DSC chu a awm thu a tarlang a. Infiamna kawngah LADC leh LDSC lo thawhdun tawhnate a tarlang a, hmachhawp an neih te a sawi lang bawk.
Post a Comment