Lawngtlai, October 29, 2021 : Lawngtlai Dist. chhungah infiamna lama hmasawnna hnathawh mek a ni, hna tan tawh leh tan mai theih tur engemawzat a awm bawk.
Matthews R. Laldinpuia, Secretay, Lawngtlai District Sport Committee chuan, Lawngtlai College Venga Residential Sports School sak mekah Academic Building, Hostel building-2 (Boys & Girls), Multipurpose Hall, Staff Quarters, Principal Quarter, Laboratory bakah Astroturf Football Ground, Basketball Court leh Volleyball Court te a awm dawn tih sawiin, he School hi Lehkha zirna nena kalpui anih dawn bakah sports leh nun chan atana pawimawh hrang hrangte zirna tur hmun atan buatsaih tur niin, 1st installment Rs nuai 1,557.77 dawn tawh atangin hnathawh hi kalpui mek a ni a ti bawk. He Sports Centre hi PMJVK hnuai atangin Rs. 3461.70 senga sak mek a ni.
Hei bakah hian Lawngtlai District Sports Center, Mampui khuaa PMJVK Scheme sum hmanga Rs 5,019.43 lakh senga Lawngtlai District Sports Complex sakna tur, Athletic Ground, Futsal Ground, Basketball Court, Volleyball Court leh thil dangte awm theihna tur buatsaih thuai a ni dawn tih sawiin, hemi atan hian 1st instalment Rs 2,258.74 lakh chu Mizoram sawrkar chuan a dawng tawh bawk a ti.
Hengte bakah hian AstroTurf Football Ground, Lawngtlai Venpuiah Lawngtlai Vengpui YLA Field tihchangtlunna tur PMJVK atang thovin Rs nuai 1,005.34 ruahman a ni a, sum pawh 1st installment dawn tawh ni bawkin, hna tan thuai tura beisei a ni mek bawk.
Lawngtlai District chhungah Mizoram State sorkar hnuaia Sports & Youth Services Department-in Lawngtlai District thalaite hmasawn nan Rs nuai 12,000 chuangin hna hrang hrang an thawk chho mek a ni.
Matthews R. Laldinpuia chuan, 'heng Thalaite hmakhua ngaia Infiamna ruhrel tangkai tak tak ni tur min pe tu Mizoram State sorkar-a Sports & Youth Services Dept. enkawltu Minister chungah lawmthu ka sawi duh a, min duhsaknate hi a taka a chan ngei theih nan theihtawp min chhuah chhunzawm sak zel turin ka beisei bawk a. Hetih mek lai hian heng kan Infiamna tur hmunte hi puitlin a lo nih hnuin kan thalai ten a nihna tur ang taka hmang thiam tur leh kan ram leh hnam chawisanna hmanrua a hmang thiam thei ngei turin ka chah duh nghal a ni' a ti.
Post a Comment