Lawngtlai, October 20, 2021 : Vawiin October 20, 2021 khan BCM Area Development Working Committee chuan Myanmar atanga raltlante chhawmdawlna atan Central YLA hnenah ₹.370,000 an hlan a, hei bakah hian Myanmar sipai ten an kahhlum tak Baptist Pastor Chung Biak Hum nupui, tuna Sangau-a a fate pahnih nena raltlana awm mek chhawmdawl nan ₹.28,850 an hlan bawk.
Vawiina Exectutive Secretary Office, Lawngtlaia hun hmanna hi Rev. K. Laldosanga, Chairman, ADWCL in a kaihhruai a, thilpek hi Rev. R. Lalnunzira, Executive Secretary, BCM Lawngtlai Area chuan Central YLA hnenah hian a hlan a. Rev. R. Lalnunzira chuan, Myanmar raltlante hi BCM hian a vei em em a, BCM ang pawhin chhawmdawlna chi hrang hrang kalpui a ni tawh a ti a. BCM in Myanmar raltlante tana tanpuina a pek chhuah tawh hi ₹.1,828,550 a ni tih sawiin, a tul anga luanchhuah zel tum a ni a ti bawk. Tuna chhawmdawlna an hlan tak hi BCM Lawngtlai Area chhunga Tualchhung Kohhrante thawhkhawm a ni a ti bawk.
Central YLA General Secretary Pu JH. Lalrindika chuan, Lawngtlai District-a Kohhran hrang hrangte hnen atangin raltlante chhawmdawlna an dawn tawh thu a sawi a, hetianga mi mangangte tana kohhran an luangchhuak thin chu lawmawm a tih thu a sawi a. Mimal atang pawhin raltlante chhawmdawlna thahnem tak an hmuh tawh thu a sawi a, heng an tanpuina hmuhte a thlenna tur dik takah a thleng vek tih Central YLA GS chuan a sawi bawk. Heng bakah hian mipui ten kan hriatpui lem lohin raltlante hi CYLA hian a buaipui thin tih sawiin, pawisa an hmuhte hi raltlante phurhkual nan te, an damdawi lei nan te, damdawi in danga refer-a kal nan te leh raltlante zinga Covid-19 hrikai an awma buaipui nan te hman thin a ni a ti bawk.
Tun dinhmunah Tuichhak lam khua zawng zawng deuh thawin Relief Camp an sa tawh a, Tialdawngilung, Lungtian I leh II in an sa mek bawk a, Saikah L in an la sa zo lova, Saikah U hian an sa dawn bawk a, Paitharah pawh Relief Camp hi an sa dawn bawk a ni. Tunah hian Lawngtlai District-a raltlan awm zawng zawng hi mi 3028 an ni a, Lawngtlai Town chhungah mi 678 an awm mek bawk. Tun thla chhungin raltlante hi mi 4000 an tlin rin a ni tih Central YLA General Secretary chuan a sawi bawk.
Central YLA President Pu Hc. Vanlalruatpuia chuan, 'BCM in raltlante tan tanpuina an hlan hi a ropui ka ti hle a, hma in lo lak tawhnaah pawh Central YLA chuan chhuanawm kan ti hle' a ti a. Covid-19 leh raltlante buaipuia hna kan thawhnaah Pathianin kan tawngtaina a chhan avangin mangang lutuk lovin kan hmachhawn ve thei zel a ni a ti.
Vawiina Myanmar raltlante tana tanpuina hlanna hun hi Rev. Lalzarliana Khiangte, Vice Chairman, ADWCL chuan tawngtainain a titawp a ni.
Post a Comment