Lawngtlai, September 01, 2021 : Vawiin khan Lawngtlai District Level Task Force Chairman, Lawngtlai Bawrhsap Dr Andrew H. Vanlaldika kaihhruaina hnuaiah Lawngtlai khawpui chhunga Village Level Task Force hruaitute chuan DC Conference Hall, Lawngtlaiah meeting an nei.
He meeting-ah hian Chairman Dr Andrew H. Vanlaldika chuan hri dona kawnga theih tawp chhuaha thawktu VLTF-te hnenah lawm thu sawiin, hri dona kawnga sawrkar kutke ber chu VLTF-te an nih avangin theih tawp chhuah chhunzawm zel turin a sawm a ni.
Dr Andrew H. Vanlaldika chuan COVID-19 hri leng chu hmuh theih loh, a nihphung pawh zir chawp pah zel a nih avangin do dan thiam a har hle a. Chuti chung chung pawh chuan VLTF-te'n tha thlah lova sawrkar an ṭawiawm zel avangin Lawngtlai District pawhin harsatna lian tham a la tawk lo mai niin a lang, a ti a. Hri dona kawngah VLTF-te leh mipuite ṭawiawmna tel lo chuan sawrkar tan chet ngaihna a awm dawn lo va, sawrkar leh VLTF-te inkarah inhriat thiam tawnna leh lungrual taka thawh hona a awm chhunzawm zel a ṭul a ni tiin, Lawngtlai District tana hri dona kawnga theih tawp chhuaha thawhpui zel turin VLTF-te chu a ngen a ni.
He meeting-ah hian Lawngtlai khawpui chhunga VLTF ai awhte an tel kim hle a. COVID-19 hri leng dona kawnga chak zawka hma lak chhunzawm zel dan tur an sawi ho a ni.
Post a Comment