Aizawl Sept. 3 : Tun laia khawvelin a thlir chu Afghanistan-a Taliban-te an ni a, engtiangin nge Afghanistan chu an kalpui zel dawn tih an thlir a ni. Nimin lama news report hrang hrang atangin Taliban chu Afghanistan sawrkar siam turin an inbuatsaih zel a, an sawrkar chu puan mai theihin an inpeih tawh nia sawi a ni. Afghanistan Taliban sawrkar chu Iran sawrkar ruangam ang a ni ang a, Taliban zinga sakhaw hotu ber chu sawrkara thuneitu ber (supreme authority) a ni dawn a ni. Tuna an sawkhaw (Islam firfiak) jotu ber chu Mullah Hebatullah Akhundzada a ni a, Afghanistan sawrkara thuneitu ber a ni dawn a ni
Taliban Information and Culture Commission-a senior official Mufti Inamullah Samangani chuan sawrkar thar siam tura inrawnna chu zawh tihtih a ni tawh tia sawiin, cabinet turte pawh sawiho a ni tawh a ni a ti a. ni hnih ni thum chhungin Kabul-a sawrkar thar tur chu puang turin Taliban chu an inpeih tawh a ni a ti
Sawrkar tharah chuan kum 60 mi Mullah Akhundzada chu Taliban sawrkar lu ber (supreme leader) a ni ang a, Iran sawrkar ruangam chu entawn (pattern) a ni dawn a ni a ti. Iranah chuan ‘supreme leader’ chu ram chhunga political leh religious thuneitu ber a ni. President chung a ni a, sipai, sawrkar leh judiciary-a hotuber turte a ruat a ni.
Supreme leader thu chu sakhua leh sawrkar (political)ah thu tawp a ni a, chutiang thuneihna chelh tur chuan Mullah Akhunzada chu hnialna a awm lo a ni Mufti Inamullah Samangani chuan a ti. Afghanistan President chuan Supreme leader thu thuin hna a thawk ang a ti
Mullah Akhunzada chu Taliban sakhaw hruaitu ‘top’ a ni a, Balochistan province-a Kachlaak area-a Islam biak in (mosque)-ah kum 15 chhung rawng lo bawl tawh a ni. Samangani chuan Taliban sawrkar tharah chuan governor-ten province-te an control ang a, district governor an awm ang a, chungte chuan district-te an enkawl ang a ti. Taliban chuan governor te, police lal te, province leh district tan police commander-te an ruat vek tawh a ni a ti. Tunah hian sawrkar rorel dan kalphung (governance system), hnam puanzar(national flag) leh hnam hla (national anthem) la tihfel loh a ni a ti.
Hetih lai hian Doha-a Taliban political office-a deputy leader Sher Mohammad Abbas Stanikzai chuan nimin khan foreign media channel-te hnenah sawrkar tharah chuan hmeichhiate leh Afghanistan-a hnam hnufual (tribe) zawng zawng atangin an tel ang a ti. Taliban sawrkar tharah chuan kum 20 kal ta chhunga Afghanistan sawrkarahtea lo tel tawh chu tumah an tel lo vang a ti.
Supreme leader Mullah Akhunzada chuan sawrkar chu Taliban movement chakna (strong hold) Kandahar atangin a vil (monitor) ang a, Taliban chuan European Union, United States leh India nen thian inlaichinna (friendly relations) neih a duh a, Talipan political office-a memberte chuan hnai takin ram hrang hrang an dawr mek a ni Stanikzai chuan a ti.
Kabula Hamid Karzai International Airport chu darkar 48 chhungin a function ang a, travel document neite chuan ram an chhuahsan thei ang Stanakzai chuan a ti a, Airport chei That nan US dollar maktaduai 25- 30 sen a ni ang a ti.
Post a Comment