Ambulance ti hian a Meaning an sawi thin a,
_"An ambulance is a medically equipped vehicle which transports patients to treatment facilities, such as hospitals. Typically, out-of-hospital medical care is provided to the patient."_
Khua a var ṭep tawh a, ar pawh a khuang al al a, mahse, khawvêl a reh ruiha thawm dang hriat tur a tam lo hle.
Zing khat chu dar 4:25am velah hian Ambulance thawm ri ka hriaa a hmanhmawh hle, emergency tih sawi nawn leh ngai lo vin a hriat mai a.
An hmanhmawh hle tih hriatin, damdawi In an rawn pan a, ka rilru te te-in 'aw natna ram khawvel' ka ti zawi sàp a! A chang hian chuan ṭah ngawih ngawih a chhuak a, a changin thihnate hi a lo awm kher khera ti ten ka ngaihtuah neuh neuh a, thihna awmlo se engtin nge ni ang tih thleng te pawn...
Ambulance thawmri kha hre reng chungin mut ka tum a, ka bengah ambulance thawmri a cham reng a, Ambulance a chuan ngailoa kan la dam, him chu ropui ka ti em em a, kan va vannei tak em ka ti a, Lalpa ṭhatna hi ka tan hian a man a sang uchuak bik niten ka hre dah roh a, ka lawm a ni.
Damlo chan te awm ve bawk mah se, natna khuma mu a, kar khat kan awm a tam lo zia te, ka hun kal tawh ka chhuikir a, amakin a ropui ka tithar ta riau mai a. Lalpa ṭhatna, min hmangaihnate hi Tuifinriat aiin a thuk zawk daih si a. Chúngte chu ka varpawh thar leh a...
Ni e, dam in kan awm a, kuhva, Zial, Tuibur, khaini/Sahdah, Pankhawr eng engemaw... adt., kan tithei a, chaw puar takin kan ei a, engmah eng to kan nei lem hlei lo va, a awm viau zel a ni, pangti a dam a, nâ neihloh miau chuan, kan vanneiah ngaiin—Lalpa hnenah te hian lawm thu sawina changte hi kan hre tak hlawm ang i maw?!
Kan samzai pakhat pawh hmaihlo-a chhiara hre vektu Lalpa hian, min hre chiang a, kan zawhloh natna min pe lo a, kan zawh leh phutawk chauhin ro min relsak thin hi a lo ni a, a hlu em a, sawifiah sen famkim chi a ni ngai dawn si lo...
Pathian hmangaihna a mal te te-a chhiarchhuak thiam apiangte hian, khawvel hi nuam an ti a, an lungawi thiam a, an nihlawh bik! Hetiang nun neih hi ringtuten kan zirzel a pawimawh tak meuh meuh a ni.
Thudangin, hmanhmawh taka rawn tlan Ambulance a an rawn phurh tak, natna khirhkhan tak vei ni ngei tur, a serious tih hriat fahran te kha, engtin takin la awm zel ang i maw...
*Inchhungkua indam tlang em? Pathian zarah kan dam lai tak a ni,* tih thu hriat te hi a man a tamin a to teh mai asin.
Kan damloa natna khumah rei tak kan mu a, a ṭhen kan ṭha/dam chhuak a, a ṭhen te erawh van neihna chang lovin, vanduaiin Ambulance kaltlangin a khamphei zawngin an In leh lo an lut a, hriat thiam har thihna te hian thla a zar fo a. Chutiang karah ambulance kaltlangin a thente chuan, damna rûn hlim takin an chhuahsan a, malsawmna, ni hun leh kum bi an chhiar chho leh thin. Lalpa hi a ṭha a ni.
Mahni chauha khawhar leh enghelh nei map lo va, ka awm chan a piangin Ambulance ṭangkaina leh a hming hi ka ngaihtuah neuh neuh fo a—
_"Australia Medical Bureau Under Law And National Corresponding Emergencies (AMBULANCE)"_
_—LH Hauhêng, Nghilhloh Rûn_
Lawngtlai
Post a Comment