Lawngtlai 2.Aug,2021 : Tokyo Olympic ah India Hockey team te beisei phak bakin an che tha a, mipa leh hmeichhe team te vawi khat an chak leh a nih chuan medal match an khel ve ve ang.
Mipa ah ram 12 tel in ram 6 ve ve in group hnih ah then an ni a, group khat a mite inkhel kual theuhin a sang sang 4 in q/final an lut a. Group A ah Australia, India, Argentina, Spain, New Zealand, Japan te an awm a. Olympic Hockey- a record tha ber vawi 8 zet champion tawh India hian match hmasa ber ah World No.1 Australia lakah 7-1 in a chesual a, mahse a insiam tha vat a Group runners up a ni chho daih a ni. Kum 1976 a champion New Zealand leh a dawltu Japan te an tla thung a ni.
Q/final ah India hian vawi 3 champion tawh Great Britain 3-1 a hnehin kum 49 hnuah a hmasa ber atan s/final an lut a, s/final ah hian World No.2 Belgium nen August 3, thawhlehni zing dar 7:00 ah an khel ang. Mipa Hockey ah hian Champion lai chu Football khel thiam Lionel Messi te ram Argentina an ni. Olympic Mens Hockey ah India chu vawi 8 champion tawhin kum 1980 kha a champion hnuhnun ber a ni a, India hi vawi 4 champion tawh Germany in a dawt a ni.
Hmeichhe lamah pawh ram 12 bawk an tel a, anni pawh hi group hnih ah ram 6 ve ve a inthenin group khat a mi te an inkhel kual a, a sang sang 4 in q/final an lut a. Lalremsiami te chu group A ah Netherland, Germany, Great Britain, Ireland leh S.Africa ten en awm hovin vawi 5 khelh ah vawi 2 chakin 4na niin q/final an invaw tling a. An ranking a hniam em avangin q/final ah group B leader leh vawi 3 champion tawh Australia hmachhawnin, vanneih thlak takin goal khat faia chakin a vawi khatna atan s/final an lut a.
Semi final ah tawn hriat ngah s/final vawi 4 zet lut tawh Agentina nen August 4.nilai zing dar 7:00 ah an in hmachhawn ang. Hmeichhe lamah Champion lai chu Great Britain niin, Netherland leh Australia nula te vawi 3 ve ve champion tawhin champion tam ber an ni.
- biakthansanga khiangte
Post a Comment