Lawngtlai 1.Aug,2021 : Assam Sawrkarin tun hnaia Mizoram leh Assam ramria innghirnghona thlengah an tihsual thup bo nana Mizoram Sawrkar ruihhlo chungchanga diklo taka an puhna chu Mizoram Sawrkar Home Department chuan hetiang hian a chhanglet.
Assam Sawrkar chuan July ni 29, 2021-a order no. HMA.19/42/2021-VIG-H&P/Pt.(l)/ecf:/168844/26 an tihchhuahah an police te chu Mizoram atanga Assam rama lirthei tlan lut zawng zawng Assam leh Mizoram ramri ah endik (check) turin thu an pe a. He order-ah hian Assam-a ruihhlo an man te chu Mizoram atanga tawlh luh niin an puh a. Ruihhlo an phur lo tih finfiah a nih hnuah, Sub-Inspector aia hniam lo Police Officer-in chhuahtir a remtih hma chu heng motor te hi hreng turin thu an pe a ni. Hei hian Mizoram mipui Assam ram paltlanga lirtheia zin veivakte tan harsatna a siamsak dawn tih a lang reng a ni.
Vawi tam tak ruihhlo tawlhruk tuma Assam ram atanga Mizorama lo lut lirthei man a lo ni tawh thin a. Amaherawhchu, hei vang ngawt hian khualzinte phurrit siamsak turin Assam atanga Mizoram ramri paltlang lirthei zawng zawng check ngei ngei tur tih thupek Mizoram Sawrkar hian a la tichhuak ngai lo a ni. Assam leh Mizoram inrina paltlanga Mizorama lo lut khualzinte chu zalen takin veivah phalsak an nih laiin he Assam Sawrkar thupek hian Mizoram atanga Assam pana lirthei tlan te chu Assam Police ten chhan mumal awm lovin harsatna an siamsak dawn niin a ngaih theih a ni.
Kum 10 liam ta chhung khan Assam ram atanga Mizorama ruihhlo tawlh luh tum tak man an lo ni tawh a. Heng an drugs man te hi heroin kg 1.05 a rit, pseudoephedrine kg 3057.08 a rit, Parvon Spas mum 4,30,385, 24.114 kg a rit ganja leh proxyvon mum 13053 a tling a ni. Hemi kaihhnawihah hian case 296 ziahluh a ni tawh a, Assam mi 395 man an ni tawh bawk. Ruihhlo hmanga sumdawn hi state pakhat chauh tihtawp theih a ni lo a, khawvel pumpuiin a buaipui a ni a. He buaina chingfel tur hian tanrual a ngai a, state pahnih ramri depa District Police duty te inlungrual taka an thawhhona hnuaiah lo chuan drugs tawlhluh hi dan beh theih a ni lo. Ruihhlo dona kawnga hmalaknaah pawisawi lo te tul loa vaukhan leh harsatna siamsak hi thil tih chi a ni lo a ni.
Post a Comment