PU ROBERT ROMAWIAN SANGAU TLANGDUNG FANG - Sangau leh a chhehvêl te tan Computer Set 17 a sem a, Sangau Damdawi In tan Oxygen Concentrator 1

Lawngtlai 14.August,2021 : Vawiin khan ICT Minister Pu Robert Romawia Royte chuan Siaha a Independence Day hmang tura a kal kawngah Hnahthial leh Sangau tlangdung khaw hrang hrang te a tlawh a. Hnahthiala amah lo hmuaktu sawrkar Official te leh Party hruaitute bakah Games & Sports hruaitute hmaah thu sawiin Minister chuan Hnahthial ah ICT Department leh NIELIT tangkawp hmalakna a IT Centre of Excellence din tum a nih thu leh, Govt. Hnahthial High School  chu Computer Set 7 pek thuai tur a ni tih a sawi a. Hnahthial DEO tlawhin Computer Set 1 a hlan a. Hnahthial a Games & Sports hruaitu te kutah infiamna hmanrua te a pe bawk a ni. 

Pu Roberta hian S Vanlaiphai Tourist Lodge tih changtlun dan tur pawh Department Officer te nên a hmunah an en a. New Kawnpui VC tan Computer Set 1 a hlan bawk a ni.

Minister hian Sangau khua a Volleyball Court leh Basketball Court siam na tur hmun te tlawhin MLA Dr.K.Pachhunga leh Pu K.Hrekunga, EM, LADC leh khawtlang hruaitute nen Football Field siam that dân tûr te an sawi ho va. Pu Robert-a chuan  Pu H Biakzauva,MLA  nen inrawnin an lo bawhzui  dawn tih a sawi a. Sangau leh a chhehvêl te tan Computer Set 17 a sem a, Sangau Damdawi In tan Oxygen Concentrator 1 a pe bawk a ni. Minister hian Tourist Lodge tih hmasawn  dan tur pawh a hmun ah a en a. Mizoram a tlang sâng ber Phawngpui tlang chu khawvel hmun dang dang atang a khualzin te tlawh chak zing ami anih avang in a chhehvel khua te pawh Sawrkar in a ngaituah zêl dâwn a ni, a ti a. Sentetfiang khuaa Chhawkhlei Kut lo hman thin pawh Mizoram Tourism leh LADC Art & Culture Department te tangkawpa chang tlung zawk a hman tum a ni tih a sawi.

Pu Robert Romawia hian Sentetfiang,Thaltlang, Cheural, Siachangkawn, Bualpui 'Ng' leh Lungzarhtum ah te Computer Set leh infiamna hmanrua te a sem a. Siaha Tourist Lodge repair hna chu tan thuai a nih tur thu a sawi.

Pu Robert Romawia Royte hi Lunglei South bialtu MLA, Dr. K Pachhunga, Pu K Hrekunga EM LADC, Pu David Zohmangaiha Councillor, Pu JB Vanhoy MDC te bakah a department official ten an tawiawm a ni.