Lawngtlai August 7, 2021 : Deputy Commissioner, Lawngtlai, Dr. Andrew H. Vanlaldika thahnemngaihin Horticulture Department, Lawngtlai chuan thingtlang khuaa thlai hmanga eizawngte chhawmdawl nan leh khawpuia miten man tlawm zawka chawhmeh an lei theih nan vawiin khan Vegetable Supply Chain an kalpui.
Heng chawhmeh chi hrang hrang item 15 te hi Bualpui NG leh Lungzarhtum atanga lak a ni a, hengte hi a rate siamsa vekin leh pack sa vekin khawpui chhunga veng hrang hrang VLTF te hnenah semkual a ni dawn a, an niin mipuite hnenah man tlawm zawkin an zuar ang.
Horticulture Office, Lawngtlaiin chawhmeh an lak khawmte hi Bawrhsaiabe (Tel khat Rs. 30), Sam tawk (KG khat Rs. 40), Changkha (Tel khat Rs. 30), Hmarchapui (Tel khat Rs. 50), Zikhlum kau (Tel khat Rs. 30), Baibing (Tel khat Rs. 30), Mula (Tel khat Rs. 20), Maitamtawk (KG khat Rs. 60), Zikhlum (KG khat Rs. 80), Bawkbawn (KG khat Rs. 60), Maian (Tel khat Rs. 20), Antam (Tel khat Rs.30), Berul (KG khat Rs. 70), Zo Purun (Tel khat Rs. 20), Sapthei hnah (Tel khat 20) te an ni a, a man an bithliahsa hmang hian zawr chhuah tur a ni.
District Horticulture Officer, Lawngtlai Pu C. Lianluaia chuan Rauthla zawhna chhangin, Lockdown avanga thingtlang mi thlaihnaha eizawngte an chawhmeh zawrhna tur siamsak leh khawpui miten man tlawm zawka chawhmeh an lei theihna tur hi kan DC hian a vei em em a, chumi atan chuan hma a la nasa hle a ni a ti a. Lockdown leh zel tur a zirin Vegetable Supply Chain hi la tih zel tum a ni a ti.
Post a Comment