Lawngtlai, August 6, 2021 : AH&Vety Department Farm, Mampuiah Bawng 12 leh Ar (Rainbow Rooster) 60 enkawl mek a ni a, Ar awpkeu tirna khawl pakhat a awm bawk a, vawi khatah artui 2500 an awpkeu tir thei a ni.



AH&Vety Farm, Mampui hian artui an lakna ZTDS chu fur ruahtui a tlak avanga an chawlh avangin Artui awpkeu tir tur an nei rih lova, an chawl mek. Nikum November thla khan Artui 1000 leh kumin May thla khan Artui 1500 an awmkeu tir a ni. Heng Ar an awkkeu tirte hi Mampui bakah Lawngtlai khaw chhungah an zuar thin a, a lian a pa ho chu an tiral bawk a, a nu erawh a vulh puitling thin bawk. Bawng hi a patuai deuh chu a hralh thin a, a nu erawh a pui atan an vulh thin thung a, kumin chhung hian a patuai hi 6 an tiral tawh a ni. Bawngpui atanga bawnghnute an thar hi Mampui kawchhungah an tiral thin bawk.


AH&Vety Farm, Mampui enkawltu Dr. C. Lalthankhumi, Chief Veterinary Officer  chuan, tunhnaia artui an awpkeu tir theih loh chhan pakhat chu lockdown lai a nih avanga a thawnna motor a awm loh vang a nih thu a sawi a. Hmunpui lama Artui phur tur hian Sumo seat hnung an book thin thu a sawi. Dr. C. Lalthankhumi chuan, Vety Farm, Mampui hian Eco-van tha vak lo pakhat an neih thu a sawi a, Aizawla han kal tur chuan a hman tlak loh thu a sawi a. Bawng chaw phur tur pawhin a hman tlak loh thu a sawi bawk. Bawng chaw hi nitin chhip ngawtin phurh thin a nih thu a sawi a, motor thar pakhat emaw an mamawh thu a sawi bawk.  


AH&Vety Farm, Mampui  ah hian thawktu Chief Veterinary Officer 1, VFA 2, IV Grade 4 leh MR 4 an awm bawk.

Post a Comment

Powered by Blogger.