Lawngtlai 31.July,2021 : Vawiin tlai dar 6:20 khan MIZOFED Oil Tanker pahnih chuan Tripura atangin MIZOFED Petrol Pump, Aizawlah petrol an phur thleng a. Food Civil Supplies & Consumer Affairs Department Director Pi Ramdinliani, MIZOFED Chairman Pu K.Laldawngliana leh official dangten an lo hmuak a ni.

       Supply Minister Pu K.Lalrinliana hmalaknain Assam leh Mizoram ramri buai avanga Mizoram mipuiten harsatna an tawh lohna turin Tripura atangin POL leh LPG hi lak luh tan mek a ni a. Supply Director Pi Ramdinliani sawi danin Tripura kaltlanga chawk luh dan tur ruahmanna hi hun engemawchen atang khan buaipui a ni tawh a. IOCL hotute nena indawrna hlawhtling tak an neih hnuah July ni 8 & ni 9 khan Supply Department hotute chuan Aizawl atanga Tripura panna kawng endikin mi engemawzat an zinchhuak a ni. 

         A vawikhatna atan Mizoram chuan Tripura atangin POL leh LPG a la lut tan ta a. POL hi Dharmanagar Oil Depot, Tripura atanga phur luh niin LPG hi Bishalgarh Bottling Plant, Tripura atanga phurh luh a ni. MIZOFED hian POL leh LPG phurtu lirthei hma hruai a tirchhuak a, a zavaiin petrol phur tanker 4, diesel phur tanker 4 leh LPG truck 2 an tirchhuak a. Anni bakah hian private truck 13 Mizoram panin kalkawngah an thang mek a, truck engemawzat Tripura panin a indawtin an chhuak thla mek zel a ni. 

        Nikuma ramria harsatna thlen atang khan Chief Minister Pu Zoramthanga hmalaknain PWD chuan Tripura atanga bungraw phurh luh a nih theih nan Zamuang-Bairabi kawngpui a chei tha a, Teirei leh Langkaih lei te pawh 20MT a rit dawl zo turin a cheitha (strengthen) bawk a ni. 

        Tripura kawng hi MIZOFED tanker te hian an kal vawikhatna a nih avangin Kanhmun khua atangin mi tlawmngai ten an tawiawm a. Mizoram an lo kir leh hnuah Kanhmunah PWD, Supply leh Police mi leh sa te bakah Kanhmun VLTF ten an lo buaipui zui nghal bawk a ni.

        Supply Director chuan Assam lamah rel kawng tihchhiat a nih avangin Bairabi Rail Station-ah FCI buhfai phurh luh theih a ni dawn ta lo a. Amaherawhchu, FCI te nena indawrin Dharmanagar FCI kudam atangin buhfai phur lut tura ruahmahnna siam a ni, a ti. Tripura atanga POL lakluhnaah VAT chawi a ngaih avangin petrol leh diesel man hi cheng 1 bawr velin a to belh dawn niin Director chuan a sawi bawk.

        Hun khirh Mizoramin a hmachhawn mekah tlawmngai taka, an la zin ngai lohna kawng zawha thawkchhuak driver te chungah Director chuan lawmthu a sawi a. Supply Minister Pu K.Lalrinliana aiawhin driver kal hmasa te hnenah a Private Secretary Pu K.Zorammuana'n lawmthu sawina sumfai a hlan bawk.

Post a Comment

Powered by Blogger.