Lawngtlai July 20, 2021 : Lawngtlai District chhunga awm Saizawh East khua positive hmuhchhuah ten vawiin thleng khan medical team te hmel an la hmu lo.
Saizawh East khuaah hian July 18, 2021 (Pathianni) khan Rapid Antigen Test hmangin sample engemawzat endik a ni a, heta tang hian mi 23 positive hmuhchhuah a ni a, nimin khan TrueNat result chhuakah mi 7 an positive leh bawk.
RAgT test zawh hian Medical Team te chuan Thingkah CCC ah hmun a awm tawh lo an tih avangin Saizawh East VLTF te chuan positive te hi Middle School-ah an dah. Medical Team te hi a test an neih zawhin Lawngtlai lamah an kir leh nghal a ni.
Pu Lalrinngheta Sathing, Saizawh East YLA President leh hri a kai avanga Middle School-a awm mek chuan, Medical Team te hian a tuk (Thawhtanni) ah doctor-te nen kalin damdawi chawh ngaite endikin, symptom neite pawh phurh chhoh an nih tur thu an hrilh niin a sawi a. Medical Team te hi nimin nileng leh vawiin lam thlenga an nghah thu an sawiin, an hmel an la hmuh loh thu a sawi.
Positive 30 zingah hian symptom nei mi 18 an awm a, hei hi a hmunah kala enfiah turin Medical Team te hi ngen an ni a, Medical Team te hi Saizawh East ah hian kal lovin, motor an tir thla a, positive symptom neite hi Lawngtlai lamah an phurh chhoh an ni.
Vawiin hian Saizawh East VLTF te hi Lawngtlaiah kalin, Medical lam an dawr niin an sawi a, an thu hawn a zirin hmalak zel dan tur an la rel dawn a ni.
Pu Lalrinngheta Sathing chuan, an awmnaah hian Nurse duty pawh an awm loh thu sawiin, anmahniin ei rawng pawh an inbawl chawp thin niin a sawi a. An ei tur leh damdawite hi khawtlanga mi tlawmngai ten an pe ṭhin niin a sawi bawk.
Hetih lai hian Dr. LP Malsawma, Chief Medical Officer, Lawngtlai District chuan, Medical Team te tunlaiin an buai zual lai a nih avang leh an indaih loh em avangin Saizawh East lamah hian an la kal theih loh thu a sawi a. Saizawh East-a Medical Team te tir turin naktukah ruahmanna siam a ni ang a ti a. Vawiin khan Saizawh East VLTF te nen an inkawm thu a sawi bawk.
Post a Comment