Lawngtlai 20.07.2021 : Nimin Parliament Monsoon session tanni-ah chuan an thawm a tha tan a, eptuten rokhawlh an siam a, Lok Sabhaah chuan Prime Minister Narendra MOdi chuan tun hnaia Minister lakluh tharte House a hmelhriattir thei lo.
Inkhawm kar laka Minister thar an awmin Prime Minister-in House a hmelhriattir chu tih danphung a ni. Speaker Om Birla’n ngawi tura a tih pawha eptu lam an ngawi duh loh avangin inkhawm chu chawhnu dar 2:00 (minute 40 dawn) thlengin chawlhtir a ni.
Prime Minister chuan Minister tharte a hmelhriattir turah chuan Dalit, Scheduled Tribes leh OBC atang tenlo neitu fapa te, economic lama hnu fual atang te, thingtlang atanga sei liante an nih avangin House chuan lawmin dawhkante an lo beng ri turah a beisei tih a sawi. Mahse, mi thenkhat chuan chutiang atanga Minister nihtir chu an duh lovin, chutiang avang chuan heti hian an che ta a ni mai thei a ni a ti.
Pu Modi chuan Speaker hnenah chuan Minister tharte hming chu a thehlut ang a, chu chu inhmelhriattir anga pawmsak mai turin a ngen. Speaker chuan Prime Minister ngenna chu a pawmsak a ni. Eptuten Minister tharte hmelhriattirna neih an phalsak lo chu sawiselin Defence Minister Rajnath Singh chuan Parliament-a kum 24 chhung a lo awm ve chhungin hetiang thil hi a thlen vawikhatna a ni a ti. Lok Sabhaa Deputy Leader Rajnath Singh chuan Parliament chakna chu tihdan phungte vawnnun a ni a ti a. “Eptu leh Treasury lamin chu kalphung hrisel chu an vawng tur a ni. Minister thar pakhat emaw 50 emaw lakluhte chu Prime Minister-in House a hmelhriattir chuan dan zawmin House chuan a ngaithla tur a ni. He thil thleng hi a lawmawm loh (sad) a, a vanduai thlak a,tih dan hrisel lo tak a ni” a ti.
Hemi hma hian member thar Maddila Gurumoorthy (Yuvajana Sramika Rythu Congress), Mangal Suresh Angadi (Bharatiya Janata Party), M P Abdussamad Samadani (Indian Union Muslim League), Vijayakumar (Congress)te chu rinawmna thu tiamtira memberah lakluh an ni.
Minister tharte intoduce tura Prime Minister a din veleh eptute an au nghal a, inkhawm kal tur chu an tibuai ta a ni.
Post a Comment