Lawngtlai, July 13, 2021 : Kumin January atanga June thla thleng khan HIV hri enna hmangin mi 401 test an ni a, mi 24 in HIV an positive. Hei bakah hian Hmeichhia naupai 504 test zing atangin mi 3 HIV an positive bawk. Naupai lo HIV positive hmuhchhuah 24 zinga 10 te hi ruihhlo ngaite an ni a, a bak 14 te hi mipat hmeichhiat hmanna atanga kai an ni.
ICTC, Lawngtlai thawktute chuan kum tin District dang aiin HIV postive kan sang ziah thin tih an sawi a, kuminah erawh tun thlengin nikuma hmuhchhuah aiin an la tlem tih an sawi thung.
HIV positive te enkawl zui a, an mamawh damdawi pe thintu ART Centre Lawngtlaia thawktute chuan Lawngtlai District chhunga HIV positive te chuan damdawi an lak that thu an sawi a, District pawn atangin mi 50 velin ART Centre Lawngtlaiah hian damdawi an lam thin an ti a, hripui avanga Centre kal thei lo tan an in lamah damdawi pe turin kalchilh thin an ni an ti bawk. Lawngtlaiah hian tun hma khan HIV damdawi hi a lak theih lohva, kumin hian ART Centre puitlingah pawm niin, damdawi pawh an semchhuak thei tawh a ni.
ART Centre Lawngtlaia thawktute chuan HIV positive te an mamawh ang damdawi an pek theih reng thu an sawi.
Post a Comment