American Business Magazine lar leh rintlak _Forbes_ chuan kum 2021 ah hian khawvel pumah mihausatawntaw (billionaires) 2,755 an awm thu a tarlang a. US ah tam berin 724 an awm a, China ah 626 awmin, India ah 140 an awm a, Germany ah 136 an awm bawk a. US tih loh a billionaire ngah ber China hi tun hnaiah _economic_ ah an thangin, mi hausa pawh an pung nasa hle a ni.
Mahse, an hausakna chuan hlimna leh lawmna ai ah, beidawnna a thlen zawk emaw tih mai turin, kum reilote chhungin Chinese millionaire leh billionaire zingah nun nin avanga mahni inthat an pung hle. Tun hnaia mihausa tawntaw 72 thi zinga 19 chu thihna pangngai, damlohna avanga thi an nih laiin, a dang mi 53 te chu mahni inthat te, accident leh mi thah te an ni thung a ni.
Beijing Qingweilio-a Physiological counselor An Lan chuan mihausa hote an inthahna chhan chu an thlarau nun hah leh ipik lutuk, tlanchhuahna tur hre si lo beidawn vang a nih thu a sawi a. An Lan chuan Chinesse pa hausa zingah _depression_ a nasat thu leh millionaire ni pha chiah lo, mi hausa tak tak zingah pawh mahni inthah a hluar thu a sawi a ni.
Fudan University a an Professor Hu chuan Chinese millionaire leh billionaire zinga mahni intihhlum a hluar ta lutuk chu a mangang thlak thu leh mipui vantlang tan pawh buaina leh harsatna, _social problem_ a nih tak thu a sawi ve bawk a ni.
Sum leh pai ngah leh khawsak sang hian mipuite ah hlimna leh lawmna, lungawina a lo thlen hauh lo a ni. UN World Happiness Report 2021 kumin March thla tawp lama an tih chhuah ah khan khawvel ah mipuite hlim berna ram chu Finland a ni a, Iceland 2na niin, Denmark 3na a ni thung a. Mipui hlimna ber ram pathum te (top 3) hi Kristian ram vek an ni satliah mai lo va, an National Flag ah Kraws lem hrawl pui an chuantir vek a ni. Finland ah mipui za a 69.8% Kristian an ni a, Iceland ah 75.1%, Denmark ah 75.8% Kristian an ni.
Mipuite hlim lohna ber thung chu tharum thawh hluarna ram, firfiak pawl rothap Taliban lalna thin Afghanistan a ni a. Afghanistan hi Muslim ram kulmuk ber pawl niin mipui za a 99.7% chu Islam sakhaw vuantu an ni. Hindu sakhaw betu 79.8% awmna leh Kristian uihum (2.3%) lek awmna India ram hi kan hlim vak lo ni tur a ni, ram 149 zingah 139na kan ni a. Hei hian a entir chu hlimna hi ram changkang leh changloh ah te sum leh pai ah te a innghat ber lo va. Isua lalna hmun, Isua hming lam rik tamna leh Isua Kraws in chawisan a hlawhna hmun a piangah hlimna hi a thleng mai zawk niin a lang a ni.
Sum leh pai hi khawvel a kan awm chhung chuan a pawimawhin vanram ah tihloh, khawvel khawi hmun pawh min thlen thei a, duh leh mamawh bakah it zawng a piang, hlimna tel lovin a lei theih bawk a. Rawngbawlna atan pawh a tangkaiin, a lo va kan awm theih loh a nih avangin a pawimawh em em a ni.
Hausak a sual lo, mahse kut tlinglo, hlepruk hmanga sum leh pai lak luh leh intih hausak hi chu Pathian pawikhawihna lian, vanram kai lohna _(1 Kor 6:10b)_ a nih avang leh sum leh pai hian Isua hmel a hliah hma em avangin fimkhur erawh a tul hle a ni. Fel lo taka deh chhuah tam tak ai chuan, fel taka deh chhuah tlemte a tha zawk. Thufingte 16:8 tih angin, dik taka sum leh pai kan lakluh avangin, kan lo rethei ta deuh a nih pawhin i pawi ti lovang u.
Kan thil ngaihlut leh ropui, sum leh pai, in leh lo ram, lirthei manto te hi kan thih rual a kan kalsan vek tur te an ni a. Khawvel ah leh khawvel piah ah Isua aia thlan tlak, Isua ai awh zo pakhat mah an awm loh avangin, khawngaihna avang chauh a Isua neitu kan ni hi a hluin, a lawmawm tak zet a ni. Isua hi kan lawmna ber a nih zel theihna tur chuan Mari angin Isua bulah awm tamin, tawngtaina hmangte, Pathianthu hmangte, kohhran inkhawm leh inpawlhona leh fakna hla hmangte in Lalpa nena inpawlin, i hnaih reng ang u.
- biakthansanga khiangte
Post a Comment