Referee tur Bjorn Kuipers, Netherland kum 48 a upa hi Radbound University Nijimegen atanga Bussiness Administration zir chhuak, Supermarket neitu a ni.
Euro 2020 puanzar chu khar a ni dawn ta a, Harry Kane leh Giorgio Chiellini te tu zawkin nge Champion Nomawi chawi ang tih chu khawvelin nghakhlel takin a thlir a ni.
FA in Football coaching experience ngah lo tak, Middlesbrough leh England - 21 chiah la enkawl Gareth Southgate Manager-a a ruat khan mak tih a hlawhin, FA chu tisual let der ah an ngai a. Mahse, an tisual lo 20018 WC ah S/final a luh pui a, chuta tanga kum thum lekah kum 55 chhunga a hmasa ber atan an la dai ngailoh ram dai puiin, Euro ah final a luh pui a ni.
World Cup vawi 4 champion tawh Italy te 2018 WC khel tura a inpet tlin zawh loh avangin May 14.2018 ah an caretaker Manager Luigi di Biagio aiah Man-City te pawh lo enkawl tawh Roberto Mancini chu Manager atan an ruat a. Mancini hnuaiah hmuh theihin hma an sawn a, 2018 September hnu lama match 33 an khelh ah chak loh an la nei lo mai ni lovin, Euro 2020 ah final a thlenpui hial a ni.
Italy in final thleng tur hian a kawng a bumboh in, a hautak hle a, Group stage ah Turkey leh Switzerland goal 3 fai ve ve a hnehin Wales goal 1 faiin a hneh a. R/16 ah Austria extra time ah 2-1 in a hneh a, Q/final ah World No.1 Belgium 2-1 in a hneh leh a, S/final ah vawi 3 champion tawh Spain penalty ah 4-2 a hnehin a vawi 4na atan final a lut a ni.
England pawhin awlsam takin final a lut mai bik lo, Group stage ah 2018 WC runners up Croatia leh vawi khat champion tawh Czech Rep te goal 1 fai ve ve in a hneh a, a thenawm Scotland goal awm lovin a draw thung a. Q/final ah vawi 3 champion tawh Germany 2-0 a hnehin, S/final extra time ah 1992 champion Denmark 2-1 a hnehin a vawi khatna atan final a lut a ni.
Italy leh England te vawi 27 an in tawn tawh ah Italy vawi 11 an chak a, England vawi 8 chakin, tum 8 chak zawk awm lovin an inhneh tawk thung a ni. Zanin hi kum 2018 hnu a an intawn leh hmasak ber tur a ni, 2018 a friendly match Wembley ah an khelh ah chak zawk awm lovin 1-1 in an inhneh a ni. Tun hnai kum 3 vel atang in hma an sawn dunin, hmachhawn huphurhawm tak ve ve a ni dun a, chumi avang chuan final pawh hian khawvel ngaihven a hlawh zual hle a ni.
Italy hi an hmingthanna chu defensive game ah a ni a, an chakna thuruk pawh defence phui tha tak leh midfield chak an nei hi a ni. Chu chu Euro 2020 ah pawh hian an that pui hle. Defence ah Italy player zinga Euro khel tam ber, vawi 17 zet khel tawh Bonuci (34) leh Euro match 16 khel tawh an Captain palian Georgi Chielinni (36) te senior lam ni tawh mahse, an tawnhriat an chhawr tangkai a, an la tawhkhirh dun hle.
Belgium nen an khelh a inhliam left back Learnado Spinazzola awmlo erawh chu an tuar deuh a, Emerson Palmierri (Chelsea) hian a hmun ruak luah zo meuh lo lam a ni. Spain nen an khelh pawh khan Spinazzola a awmloh a langin, Spain khan veilam atangin cross ball tha tak an nei thin a, Italy laka goal shoot vawi 16 lai an neihna chhan pawh Spinazzola awmloh vang a tihtheih awm e.
Midfield ah London Club Chelsea midfielder Jorginho te, Serie A a Intermilan champion puitu, passing fing leh dik Nicolo Barella te, Ligue 1 a PSG an champion theih nana thawh hlawk tak, thluak tha Marco Verratti te an rintlakin, England tan pawh a dehkhirh ber ber tur te an ni.
An hmatawng ho an inrual tlangin an goal thun zat pawh in an thlau lo hle, season liam ta a Serie A a goal 20 thuntu Lazio striker Ciro Immobile hi boruak ah a hlauhawm hle a. Napoli striker season liam ta Serie A a goal 19 thun tu Lorenzo Insigne hi feet 5’4 chauh a sang ni mah sela, a che rangin a pumraw tet anga en chi a nilo Euro 2020 ah hian goal 2 a thun der tawh a ni. Semi final a goal ropui thuntu Juventus striker Federico Chiesa hi kum 23 chauh ni mah sela, a khel erawh a puitlingin, boruak sang ah pawh a buai lo hle a ni.
England keeper Jordan Pickford hian S/final boruak kha a zo tawk lo nge, hun dang a tluk lovin, a ball pet chhuah te pawh dik lo a tamin, player rating ah pawh England player zingah a hniam ber a ni. A insiam tha lo a nih chuan Immobile leh Insigne te lakah goal a venhim zawh loh mai pawh awm thei a ni.
England defence hi Italian defence ang mai a, khawng leh tawntlang harsa a ni a, hei hi an vanneihna pawh a ni. Italian defender Bonucci pawhin England defence chu a fakin _Super Defence_ tiin a sawi. Man-Utd Captain Harry Maguire hi a khauhin, a lu a hmang thiam a, set piece ah a hlauhawm hle, Club khat a khel tlang tih takah Luke Shaw nen pawh an in man hle a ni. Man City in season liam ta a Premier League nomawi an chawi nana thawh hlawk tak Kyle Walker leh John Stones te an nghet dun hle bawk a. S/final ah Denmark khan goal shoot vawi 6 chiah an nei a, heta tang hian an defence dinhmun a hriat theih ruak awm e.
Italy hian an midfield tha hi an chakpui fo avangin Southgate hian midfield a thuam chak deuh chu a ngai ngei ang, Leeds defensive midfield Kalvin Phillips leh Declan Rice (West Ham) te Mason Mount (Chelsea) te tan inthlahdahna hun a awm lo khawp ang. German an khelh ang khan midfield hoten _man to man marking_ a, an khelh puite hup tlat a, midfield atanga ball chhuak tur dang bet tur a tan khawh tlat a ngai ngei ang.
England hian S/final ah Denmark penalty area chhungah ball vawi 56 an in pe kual a, 1980 a data an siam atanga in an khelh puite penalty area a goal in pe kual tam ber an ni a. Goal shoot pawh vawi 20 neiin, chung zinga 10 chuan a target a fuh a, Q/final thlenga match 1 a goal shoot an neih tam ber Ukraine laka goal shoot vawi 10 an nei chu an khum hneh hle a ni. A hma tawng goal 4 thun tawh Harry Kane (Tottenham) leh khelh chhiat nei ngai meuh lo, _Best Player_ tur a rinkai, goal 3 thun tawh Rahem Sterling (Man City) bakah kum 19 a upa Bukayo Saka (Arsenal) pawh hian S/final ang khan an khel leh thei a nih ngat chuan an tawrhlehawm leh khawp ang.
Final en nuam vek u le...
- biakthansanga khiangte
Post a Comment