World Blood Donor Day chibai bûk

Give blood and keep the world beating' (Thisen pe la, khawvel chelh ding rawh)


Vawiin June 14 hi thisen petute ní, World Blood Donor Day a ni a, thupui chu 'Give blood and keep the world beating' (Thisen pe la, khawvel chelh ding rawh) tih a ni. Day pual hian Association for Voluntary Blood Donation (AVBD) chuan thuchah tichhuakin, thisen petute leh Mizoram mipui chibai an bûk.

AVBD chuan, sorkar kum liam ta, April 2020 - March 2021 chhungin Mizo­ramah thisen unit 26,658 pek a ni tih sawiin, "Heng zinga unit 23,911 (89.66%) hi a thlâwna pek (voluntary donation) a ni. Blood donation camp vawi 530 neih a ni a, chu'ngah chuan thisen unit 15,277 pek a ni. Thisen petu mimal leh pawl tinte chungah lawmthu kan sawi a, kan chhuang tak zet a che u," an ti.

World Blood Donor Day hi hripui léng avangin nikumah mumal taka hman theih a nih loh bakah, kuminah pawh hman theih a ni lo tih tarlangin AVBD chuan, "Hripui lêng a ziaawm chuan hun remchang hmasa berah hman tum a ni," an ti a; thisen pe ṭha pawlte chawimawi hun buatsaih an tum thu an tarlang.

AVBD chuan, hrisel ṭha tan thisen pek a hlauh­awm loh tih sawi­in, "Inthlahdah thei kan ni lo a, thisen pe tawh ṭhin zawng zawngte uar zawka thisen pe zel tur leh la pe lote pawh pe ve ngei turin kan sâwm a ni," an ti a; pawl hminga thisen pek bakah, mahnia pek uar turin mipui an ngen.

Hripui lêng avangin inkhârkhip lai ni mah se, thisen pek theih reng tho a ni tih sawiin AVBD chuan, "Páwl hming donation camp tih theih reng a nih bakah, mimalin blood bank-ah pek theih reng a ni," an ti a; thisen pe tura chhuah ngaite tan AVBD hruaitute hnenah inhriattir theih a nih bakah, mahni awmna local/village task force-ah phalna dil theih a nih thu an sawi.

AVBD tarlan danin, World Health Orga­nisation chuan blood group hmu­chhuaktu Dr Karl Landsteiner-a pian champha, June 14 hi World Blood Donor Day-ah a puang a, kum 2005-ah hman ṭan a ni. Mizoramah chuan kum 2007-ah hman ṭan a ni a, thisen petute chawi­mawina hun atan hman ṭhin a ni

Post a Comment

Powered by Blogger.