VAWIIN KHAN SARON VENGAH RANDOM TEST NEIH A NI A, MI 44 POSITIVE HMUH A NI

 VAWIIN KHAN SARON VENGAH RANDOM TEST NEIH A NI A, MI 44 POSITIVE HMUH A NI

Vawiin (15.06.2021) chhun khan YMA Day pualin Mizoram a Covid hrivei tamna Saron Veng Containment- Area-a chengte random test neih a ni a, mi 44 positive hmuh chhuah an ni.

He random test hi bialtu MLA Pu Robert Romawia Royte rawtna anga kalpui niin, Health Department hriatpuina in BN Hospital, Kulikawn te nen tang hoin hma lak a ni. Saron Veng LLTF ten a tul angin an puibawm a ni. 

Saron Veng Taitesena Section atangin mi 185 endikah hri kai hmuh chhuah 16 an awm a, Khuangchera Section-ah endik 227 ah hri kai 28 awmin, Vanapa Section-ah endik 7-ah hri kai an awm lo. Vawiina endik zawng zawng hi mi 419 an ni a, hri kai hmuhchhuah hi mi 44 an ni.

Pu Robert Romawia chuan “Saron Veng hian kalphung pangngai kan dampui zo si lova, hetia kan tih mai hi a ngai" tiin, Health Minister leh Health Department te a bia a. Test Runpui neih chu tha an lo tihpui ve bawk a, LLTF te nen tangrualin a ma sum sengin test Runpui hi an buatsaih ho ta a ni. Saron Venga Covid-19 test runpui a hlawhtlin dan a zirin Aizawl East-II veng danga containment zone-ah te pawh chhunzawm a nih tur thu Pu Robert Romawia chuan a sawi.

Pu Roberta chuan, "Aizawl East-II bialah hri vei an tam rih hle mai a, mahse vengtin tanrualna a thain he hripui hi Pathian zarah kan la do hneh ngei ang tih ka beisei" a ti. Press mite zawhna chhangin Pu Roberta chuan Urban Ministry-in DRDO kaltlangin Oxygen Plant lian chi, 13 zet rawn pek an tum thu leh Aizawl District-ah 3 leh District Hqrs. dangah heng Oxygen Plant te hi, DRDO in, a rawn bun thuai dawn tih a sawi.

Pu Robert Romawia hian Tata Trusts atangin niminah Oxygen Concentrators 11 leh Accessories Mizoramin a dawn thar chu, a mamawh zualna hmunah semchhuah tura enfel mek a nih thu a sawi a. YMA Day chibai buk nan, a biala Veng 7 ah Rs 10,000/- theuh a sem bawk a ni. 

Hei bakah hian Pu Robert Romawia Roite chuan, Aizawl South-I biala LLTF 7 te leh 4C te pawh YMA Day chibai buk nan Rs 10,000/- theuh, MNF Aizawl South-I Block kaltlangin, a hlan.