TRINITY HOSPITAL-AH PATHIAN HAUSAKZIA KAN HMU!
Kawrthindênga Thawktu chhungkua (Missionary-te) chuan kan School naupang damlo Birbahu, (12) S/o MC Lalnunmawia, hun rei tak pum puar nasa avanga School pawh kal ve thei lo chu neih ang ang thawhkhawma hmunpui lam panpui kan rawt a.
Birbahu hi Kum 2018 March thla khan malaria leh thin lian avangin thih ngamin a nâ a. Lawngtlai Civil Hospital-ah hun rei tak an inenkawl hnuah pawh hma a sawn thei lo va. Doctor-te chuan hmunpui lam pan turin thurawn an pe a. Mahse, chhungkaw harsa tak an nih avangin an tan hmunpui lam pan chu thil awl-ai a ni lo. A pum puar nasa avangin rual a pâwl ve thei lo va. Kum thum lai mai chutianga a awm takah chuan a chauh phah hle bawk a ni.
Doctor fel tak mai, Dr. Remthanga chu a natna awmzia te zawt fiahin ral aṭangin kan be rawn a, ani chuan a lo khawngaih hle mai a. Dr. Lalbiakzuala (Pu BZ-a), Trinity hospital chu min biaksak a. Dr. BZ-a chuan hospital kan hruai thlen theih chuan an lo buaipui theih dawn thuin min lo chhang ta mai a! A lawmawm duh asin!
Ni 29 April, 2021 (Ningani) tlaiah chuan Birbahu-te pafa chu Hospital panpui an ni ta. Doctor leh nurse-ten an lo duat hle a, engkim an lo tihsak vek a. "Missionary-te rawn dah a nih chuan 'Pathian fapa' a nih chu", an ti a, 'Bahubali' tiin hlim takin an lo ko fiam zui a. A pum atang hian tui litre 12.5 zet an siak chhuak a ni. An awm chhung hian khawngaihna thil thlawn pêk tam tak an dawng bawk.
Kar thum zet hnuah chuan a natna chu Constrative Pericarditic (Lunga thisen pump-tu a phui avanga pericardiac window siam ngai) a ni tih hriat chhuah a lo ni ta a. Mizoramah khawih theih a ni lo, dam fel viah tur chuan phai lama zai ngai a ni. Mahse, Pathian chuan eng kim a ti thei. He natna hi Mizoram a kan la hmelhriat vak loh leh natna vâng tak a nih thu doctor-te hian an sawi nghe nghe.
In lama enkawl chhunzawm theih a nih tawh thu kan dawn avangin, ni 21 May, 2021-ah chuan va hruai an ni a. Damdawi in senso (Bill) hi Rs. 1,67, 002/- (Nuai khat, sing ruk, sang sarih leh pahnih) lai a lo ni a, hei pawh hi a tlem thei ang bera chhût, chaw ei man leh doctor visit-na pawh la tel miah lo a ni!
Missionary-te thawh khawm aṭanga kan hman bâng tlem tê chu pêk kan han tum a. Chungte chu la duh lovin, "Khangte kha a ṭul ṭulah hmang zui u la, senso hi chu kan lo tum vek ang e", tiin TRINITY HOSPITAL, AIZAWL chuan min hrilh ta mai a! A thlawnin Damdawi in chu kan chhuahsan thei ta a nih chu!
Trinity Hospital-a thawktu zawng zawngte thil tih hi a ropuiin a man a tam mang e! Pathian hausakzia kan hmu a, mi harsa zawkte dinhmun hre thiama hmangaih taka an thiamna leh sum tam tak an seng hi keini tan rulh zawh sen a ni lo. Mi rethei leh chhumchhe berte pawhin an ban phak damdawi in, Trinity Hospital hi Lalpan malsawm zel se la, nasa takin lo thang duang zel se tih hi kan tawngtaina leh thinlung taka kan duhsakna a ni e.
'A kut chu mi rethei lamah a phar a. A ni ,renchhamte thlengin a ban phâk a.'
Thufingte 30:20
Thawktu Chhungkaw Welfare
Kawrthindeng Synod Mission Compound,
Lawngtlai District, Mizoram.
Post a Comment