JUNE 11 zàn dâr 9:23 vêla Ṭhuampui Venga lungrem chimin in a hnàwla mi pali thihnaah in neitu leh thi chhûngte’n Bâwngkawn PS-ah FIR an thehlut a. Police-te’n tum reng vàng ni loa tualthah, mahni emaw midang emaw tána hlauhawm taka chê leh chêng 50 hu aia tam mi bungrua tih chhiat sak thubuai an ziaklut.

 

In neitu Lallianvela, Ṭhuampui Veng chuan June 14 khân Bâwngkawn PS-ah FIR thehlutin a in (Assam type), chhawng hnih, chhûngkaw hnihin an luah chu June 11 zàn dâr 9:23 vêl khân vawi lehkhatah a chhaka feet 15 vêla sâng lungrem Vungbiakmuani te rem chimin a hnawl niin a sawi.

 

C Lalchuangkima, Ṭhuampui Veng pawhin June 14 khân Bâwngkawn PS-ah FIR thehlutin Lallianvela in an luah chu June 11 zàn dâr 9:23 vêl khân a chhaka Vungbiakmuani lungrem feet 15 vêla sâng chimin a hnàwl a. A fapa te pahnih Joseph Lalrinhlua (7) leh Daniel Lalngaihsaka (4) te chu lungrem chim hian a chhilh a, a hnuah thi in an hmu a, a nupui Zâirimâwii pawh a hliam niin a sawi. C Lalchuangkima chuan lungrem chim chhan chu khuarel chhiatna ni lovin mihring siamchawp chhiatna ni-a an hriat thu a sawi.

 

Lalbiakzuala, Ṭhuampui Veng pawhin June 14 khân Bâwngkawn PS-ah FIR thehlut ve in Lianvela in an luah chu June 11 zàn dâr 9:23 vêl khân a chhaka feet 15 vêla sâng Vungbiakmuani lungrem chimin a hnawl a. He lungrem chim avàng hian a fanu Lalthlamuani (16) leh Lalṭanpuii (16) te chu lung leh leivungin a chilh a, a hnuah an ruang hmuh a ni a, amah pawh lungrem chim avàng hian a hliam niin a sawi. Lungrem chim chhan chu khuarel chhiatna ni lovin mihring siamchawp chhiatna ni-a an hriat thu a sawi.

 

FIR thehluttute zawng hian lung hi an rem lâiin an tâna a hlauhawm thu te, thawk chhunzawm tawh lo tùra vawi tam tak an ngen chungin an ti lui zêl a, heti hian an tuar ta niin an sawi ṭheuh.

 

Police-te chuan in neitua puh Vungbiakmuani hi tunah Mizoramah a awm lo a, an lungremtu mistiri Lalkhawsiama (36), Ṭhuampui Veng chu an man a, tum reng vàng ni loa tualthah (IPC 304), mahni emaw midang emaw tána hlauhawm taka chê (IPC 336) leh chêng 50 hu aia tam mi bungrua taka tih chhiat sak (IPC 427) thubuai an siamsak a, thu an zawtfiah mek niin an sawi a. Vungbiakmuani pawh man theiha a awm veleh man an tum thu an sawi.

 

Police te chuan Lalkhawsiama hi Vungbiakmuani te hian an hna enkawl tùra an rawih a ni a, a neitute state pâwna a awm avàngin hnathawktu ber a ni a, a mawhphurtu niin an man niin an sawi a. Lalkhawsiama erawh chuan Vungbiakmuani te mi chhawr a nih angin an duh dànin a thawk niin a sawi, an ti.

 

FIR thehluttute hian zângnadawmna an beisei lo a, dàn anga hma lâk sak tùrin an ngèn niin police hotute chuan TFD an hrilh a. DM&R Minister in chhui chiang tùrin Aizâwl Bawrhsap ruat mah se anni chuan FIR an dawn an bawhzui niin an sawi a. Minister thupek angin a chhuichiang tùr zingah engineer te an tel ang a, an hmuh dàn te thuneitute kuta an hlan hunah chu chu Court-a chargesheet an thehluh hunah an thehlut tel ve dâwn niin an sawi.


-THE FRONTIER DESPATCH

Post a Comment

Powered by Blogger.