Lawngtlai 13.06.2021 : Kumin hian Ni 365 a awm a. Vawiin hi 164-na a ni. Hri leng avang in sakhaw punkhawmna pawh khar chhunzawm zel ani a. Nitin hri kai kan pun belh zel a, sorkar pawhin hri laka mipuite kan him theihna turin SOP zawm turin min duh a, min duhna ang hian mipuite pawhin zawm hram hram i tum theuh ang u. Vawiin lama thil thleng thenkhatte -
1. Vawiin tlai dar 5:00 thleng khan District hrang hranga Covid-19 vei enkawlna hmun atangin mi 117 an chhuak. Aizawl - 103, Lunglei-7, Siaha-3, Kolasib-2, Saitual-1 leh Lawngtlai-1 te an ni.
Tukin June 13,2021 (Pathianni) dar 7:00 Covid-19 result update a RAgT positive Mission Veng, Kum 35 mi kha ZMC a data buaipuitu ten an lo tisual palh a, positive ni lovin negative tih tur zawk a ni e.
2. Vawiin ni 13.06.2021 hian Mizoram-ah Covid-19 avanga nunna chan pathum an awm belh leh ta a, ti hian Mizoram-ah Covid-19 avanga nunna chan 65 an awm ta a ni.
Vawiin a boral te chu Lalchhuanawmi (42), Electric Veng Aizawl, Pu Ruallawma (86), Saron Veng, Aizawl leh Pu Thanthuama (65), Ramhlun South Aizawl te an ni.
3. Mizoram puma ni 20.04.2021 atanga COVID-19 laka inven nana inkhuahkhirhna khauh zawka kalpui chu Lawngtlai khawpui chhungah pawh khauh taka kal chhohpui zel a ni a. Lawngtlai khawpui chhung veng 12-a COVID-19 Executive Duty-te chuan vawiin khan dan bawhchhia mi 41 manin, he'ng an mi mante hi pawisa Rs 4,000/- chawitir an ni a. COVID-19 vanga inkhuahkhirhna kalpui chhung hian dan bawhchhia mi 1,164 man tawh niin, pawisa chawitir zat hi Rs 1,35,550/- a tling tawh a ni.
4. Vawiin khan Chhuanthar, Baktawnga an hotupa Zionghaka (Ziona) chu a boral.
Ziona hi Trinity Hospital panpui a ni a, thlenpui a nih chuan a lo thi tawh. Damdawi-ina chhinchhiah anih dan chuan Ziona hi kum 76 niin, tlai dar 3-ah a thi a, thisen sang leh zunthlum nei a ni. Pu Ziona hian nupui 39 neiin fa 94 a nei a, tu pawh 33 a nei bawk
5. Mizoram Sawrkar chuan Covid-19 darh zel tur venna’n Order No.B.13021/101/2020-DMR/Vol-IV, dt.12.6.2021 hmanga in khuahkhirhna a tih chhuah leh tak avangin Dt.14.6.2021 atanga Dt.20.6.2021 thleng hian Aizawl Municipal Corporation Area chhungah “Zero Tolerance Week” kalpui tur a ni ang.
6. Mizoram sorkar thuchhuah chuan Mizoram a cheng India khua leh tui te chu Covid-19 hri danna a thlawnin a pe vek dawn tih thuchhuah an siam.
7. Champhai Police te chuan Khankhawn Police check gate ah tukin zing dar 1:00 khan dan lo anga lak luh Kuhva ro bag 70 tualchhunga an hralhna rate in cheng nuai 7,70,000 chuang man an man. Kuhva ro neitu ni a puh Lalhmunmawia, Tahan chu man a ni.
Post a Comment