Lawngtlai June 22 : Lawngtlai khawpui chawmtu, Chawnhu Pump House atanga Lawngtlai tuipekna pipe line lian chu leiminin a hnawl chhiat avangin tunhnaiah Lawngtlai veng tam zawkah tui pek theih a ni lo.
Lawngtlai khawpui chawmtu tui pipe lian pathum hi Lawngtlai Chandmary Veng hnuaiah leiminin a hnawl chhia a, hei vang hian College Veng leh Chandmary tih loh chuan veng dangin tui an dawng thei lo.
Pipe lian chhia hi ninim nileng khan siam a ni a, pakhat siam that niin, vawiin lamah hian khua a that chuan pahnih chhia hi siam chhunzawm a ni leh dawn a. PHE, Lawngtlai SDO Pu Sangromuana chuan vawiin hian an siam zawh hman a beisei thu a sawi a. He pipe line pathum hi siam zawh a nih chuan Lawngtlai khawpui chhungah a pangngaiin tui sem chhunzawm leh a ni ang a ti bawk.
Fur ruahtui a tlak tam avangin Lawngtlai khawpui tuilakna ber Chengpawngli ah tui a pump theih lohva, tuna hian Chengkawl lui leh Nghafuan liah tui hi nitin dar 10 vel pump thin a ni.
Post a Comment