Lawngtlai Bawrhsapin ran khuahkhirhna tur thupek a chhuah
Lawngtlai, Nikir thla ni 16, 2021: COVID-19 hri lengin mipui nunphung a tihkhaihlak a, harsatna nasa tak a siam karah, hemi harsatna belhchhah lo tur leh faina kawnga hma sawn zel nan ran vulh chungchangah thu pek chhuah tula hriat a nih avangin Lawngtlai District Magistrate & Bawrhsap Dr Andrew H. Vanlaldika, MCS chuan CrPC section 144-na tlawh chhanin a hnuaia mi ang hian ran khuahkhirhna tur thupek a chhuah.
1. Lawngtlai District chhungah ram dang atang leh District dang atangin vawk leh vawksa atanga siam reng reng lak luh phal a ni lo.
2. Mi tu mahin an ui khawlaiah an chhuah tur a ni lo. An chhuah a nih pawhin a neitute'n chain-a thlungin, an kai tur a ni.
3. Ar (Zo ar) vulhtute'n an ar vulh khawlaiah chhuah phal a ni lo, a in/bawmah an khung vek tur a ni.
4. Mi tu mahin an ran vulh lai khawlai leh ramhnuaia tla chi sial, bawng, kel leh a dangte a mei vuan lovin (enkawltu awm lovin) khawlaiah leh ramhnuaiah an tlattir tur a ni lo.
5. Vawk vulhtute'n an ran vulh a huangah an khung vek tur a ni.
6. Ran talhtute'n ran hrisel tha chauh an talh tur a ni. AH & Vety Doctor awmnaah chuan an vawk talh tur a hrisel leh hrisel loh an entir hmasa ngei ngei tur a ni. Vety Doctor te'n certificate an pekte chauhin ran an talhin an zuar thei ang.
He thupek hian thu leh a awm a nih loh chuan chhuah a nih ni (June ni 16, 2021) atanga thla 2 chhung a huam ang a. A zawm lote chu IPC section 188-na hmanga hrem an ni ang.
Post a Comment