June 23, 2021 hian Gauhati High Court, Aizawl bench PIL ngaihtuah tura ruat Division Bench, Judge pahnih awmna, Justice Michael Zothankhuma leh Justice Nelson Sailo te chuan he thu an ngaihtuah tawhna bawhzuiin an ngaihtuah leh dawn.
An thu laimu ber chu chhim bial district pali te tana Civil Hospital, Lunglei a RT-PCR dah tura dilna a ni. He thu buai remna hian District hospital dang zawng zawngah RT-PCR diagnostic laboratory dinna tur rawn vuak thluk kep dawn mai dawn em tih Court ngaihdan hmasa ațanga thlirin a ngaihtuah tel theih. High Court of Sikkim leh Gujarat High Court te rorelnain District zawng zawng Covid-19 sample test rintlak ber 'golden eye' an tih mai RT-PCR khawl bun vek turin thu tlukna khauh tak a siam a. Hei hi mipuite hriselna a dah pawimawh vang leh mipuite hriselna chu thil dang engmah nen sawifin leh thleng chi-ah Court hian a ngaih loh vang a ni.
RT-PCR laboratory hi Mizoram district hospital zawng zawnga dah tura High Court thu tlukna hian a rawn hawl thluk kep tel anih pawhin thil mak a ni lo ang.
He thu buai PIL chhim bial aiawha theh luttu hi LH Lalzarzoliana niin High Court-in PIL/1/2021 ah pawmin thu buai hming chu LH Lalzarzoliana versus State of Mizoram and 4 others tih a ni.
Thu buai theh luttu aiawh ( Petitioner advocate) chu Pu JC Lalnunsanga niin a ni hian team a nei a, chung advocate te chu Lalrinhlua Tlau, Baby Laldinsangi, Lalrokunga Paute te an ni. Pu JC Lalnunsanga hi Supreme Court of India, New Delhi ah a practice s ni a. Video conference hmanga thu buai hi ngaihtuah anih dawn avangin Delhi ațang pawhin Court ah hian a rawn ding thei a ni. He thu buai kaihhnawiha thil țul te chu a junior advocate Aizawl/Mizoram chhunga awm te hian an lo fawmkhawm thei vek thung a ni.
Mizoram sorkar aiawh hian Pu C. Zoramchhana Addl AG a ding thung ang.
A chepa kaiin
March 2020 ah Health Minister in Lungleiah Mizoram chhim lam district 4 te tan RT-PCR laboratory din a tiam.
June 13, 2020 ah Lunglei DC office ah District Hospital official te leh Pu Zodintluanga Ralte MLA te chu inhmukhawmin sorkarin rem atih chuan RT-PCR khawl a pek thu a sawi. June 26, 2020 ah Pu Zodintluanga Ralte MLA in RT-PCR khawl a pe a, hei hi District Hospital Lunglei ațangin DC office Lungleiah hemi ni la la hian dah sawn a ni.
Mizoram sorkarin RT-PCR khawl District Hospital Lungleia bunna tur enfiah turin expert : Dr. Lalhlenmawia, HoD Department of Pharmacy RIPANS, Prof Zothanzama Asso. Professor Department of Environmental Sciences, MZU, Dr Vanramliana Asst. Professor, Department of Zoology Pachhunga University College te Lungleiah tirin June 15, 2020 ah a hmunah enfiahin District Hospital Lungleia room ruak pathum awm chu RT-PCR lab dinna tlakah an ngai.
COVID-19 Emergency Response avangin ICMR chuan RT-PCR laboratory atan Biosafety Level 3 (BSL - 3) ngai atih chu 02.06.2021 khan BSL-2 ah a ti hniam. Hetiang anih tawh lai hian tih khawtlaina atan Mizoram Sorkar hian RT-PCR khawl bunna tur hian BSL-3 lab kher ngai niin a hre lui tlat em ni?
High Court in a ngaihtuah tawh dan
June 16, 2021 khan he PIL hi ngaihtuah a ni tawh a, thu tlukna siam nghal loin Mizoram Sorkar chu zawhna tam tak Court hian zawt letin chung zawhna te chu chawlhkar khat chhunga insawifiah tur leh chhang turin a ti a.
A pawimawh zual te chu :
Court hmuh dan :
Mizoram sorkar-in Lungleia Covid-19 sample test-na tur RT-PCR khawl pek anih ațanga kum khat chuang anih hnu pawha a hmang duh lo chu Court hian a hre thiam loin mak a ti a, hri pui hma chhawn dan turah a ngai lo. Lungleia Mizoram sorkarin expert a tirh te report ah pawh chhim lam district pali tana hman theih mamawh a nihzia tarlan a ni a. Thul tho taka heng expert a tirh te report hi pawm, pawm leh lo awma tihna pawh a awm.
Mizoram Sorkar thu chhuah 7th May, 2021 ah pawh hian RT-PCR khawl hi Civil Hospital ah dah theih a ni tih a chiang a. Chuti chunga RT-PCR Lunglei a bun hi Sawrkar hian politics thil anga a lak loh ngei Court chuan a beisei a ni.
Hetiang khawpa mipuite hriselnain a mamawh tawh laia Lab sak nana Rs 7.8 crores NEC a dil hi sawrkar thu in kalh a ni. Hmanhmawh taka thil ngaihtuah ngai nen hei hi a inpersan hle a ni.
Hetiang taka Sorkar hmalakna chîbuh tak avang hian harsatna lian tham tak a thlen tawh reng lai a, thil lo la thleng tur ni awm ang vela tih kual kawi hi Sorkar hma lakna a ni. Sawrkar thu chhuah leh hma lak dan te hi a inkawkalh deuh nuk bawk a ni.
Central Sorkar-in March 23, 2021 ah Covid-19 sample endikna atan RT- PCR diagnostic laboratories ațanga sample test 70% chung lam hmang tura India ram pumah hriattirna a chhuah tawh laia Lunglei Civil Hospital chu sawi loh district capital zawng zawnga RT-PCR laboratory dah a tum lo hi Court chuan hriat thiam a har a ti a ni.
He thu buai Court in a ngaihtuah leh hunah sorkar ukil hian ni 7.5.2021 a sawrkar thu chhuah anga RT-PCR dinna tura an hmalakna zawng zawng court hnena hriattir tura tih a ni.
Court hian Mizoram sorkar hnena a zawh te chu :
RT-PCR khawl bunna tur chungchanga hmalak tawhna zawng zawng Original copy court ah a pe ang.
Mizoram District hrang hrangah RT-PCR engzat nge hman a ni tih a hriat tir bawk ang.
Technicians mi eng zat nge RT-PCR enkawl tura a chhawr leh an thawhna hmun a hriattir bawk ang.
Mizoram sorkar hian Health Dept hnuai-ah Lab technician, Microbiologist leh health worker nghet engzat nge post a neih leh post ruak court a hriat tir ang a. Swab sample la leh covid test ah mi engzat chiah nge volunteer tih pawh court a hriattir ang. ZMC bikah Lab technician, Microbiologist leh health worker nghet engzat nge post a neih leh post ruak court a hriat tir bawk ang.
Mizoram Sawrkar hian court leh hma ngeiin chhanna a thehluh tur a ni .
Case urgent a nih avangin ni June 23, 2021 ah ngaihtuah leh tur a ni .
India Constitution Article 21 chhungah fundamental rights chhunga Right to Life hian a kel tel tlat chu Right to Health a ni a. Covid-19 pandemic in khawvel pum a tuam mek lai hian khua leh tui te himna, hriselna aia ngaih pawimawh dang neih leh inthlahdahsan leh ngaihthah hi Supreme Court leh High Court dang te pawhin rem an ti lo tih hi Delhi khawpui chhunga Covid-19 thawh hnihna avanga oxygen harsatna a thlen laia Supreme Court in Central Sorkar thu pek tih tih tur khauh pui pui a tuksakah khan kan hmu thiam awm e.
Hetiang hi Court lamin Covid-19 hri pui kaihhnawiha thu tlukna a lo siam tawh dan a ni. Lunglei chhunga RT-PCR khawl bun tura ngenna thu buai hi Public Interest Litigation (PIL) anih ang ngeiin Lunglei leh Mizoram chhim lam district 4 tan mai ni lo, Mizoram chhunga mipui zawng zawng nghawng a ni a, Gauhati High Court Aizawl bench hian High Court dangin rum taka mipui hriselna thlavang an hauh a, District Hospital zawng zawngah RT-PCR khawl bun tura State Sorkar hnenah thu a pek ang hian thu tlukna a rawn siam dawn em tih chu Mizoram mipuite hian an ngaichang țhup a ni.
ghcazbench.nic.in
====22==06 ==21==
Huna Kawlvawm
Post a Comment