An khuaah signal a that loh avangin online-a exam nan ram lamah in an sa
Siaha atanga km 150 vela hla Tuipang lam, Mawhre khuaah chuan signal a that loh avangin online-a exam tur zirlai naupang ten ram lam an pan.
Vawiin atangin under-graduate chu online hmanga exam tan a ni a, Mawhre khuaah hian online-a exam tur zirlai 15 vel an awm a, an khuaah signal a awm that loh avangin Mara Student Organisation, Mawhre Branch chuan zirlaite dinhmun ngaihtuahin an khua atanga km 3 hla, signal awm thatna hmunah in te sain, chutah chuan zirlai naupang ten exam an bei a ni. Zirlaite exam na tur hian nimin khan in te hi sak zawh a ni a, vawiin khan exam an tan. A bul hnaiah thutna siam a ni a, ruahsur loh lai a nih chuan pawnah exam an nei a, ruah a sur chuan in te an sakah hian an exam a ni.
Pu K. Hraki, MSO Gen. Hqrs. Siaha a Game & Sport Secretary, Mawhre khua ni bawk hnen atanga thu dawn danin Mawhre khuaah hian airtel tower pakhat a awm a, mahse 4G a nih loh avangin internet khawih nan chuan hmantlak a ni lova, Jio leh BSNL tower a awm lo bawk.
Pu CH. Beikhochhi, MSO General Hqrs. Siaha President chuan Mawhre khuaa zirlaite harsatna hi DC Siaha hnenah a thlen nghal tih a sawi a, DC chuan a tul anga hmalak a tum thu a lo hrilh a ni.
Post a Comment