Zaninah English Premier League hmawr bawk a ni dawn; Champions League khel tur inchuh a na dawn

    Zaninah khawvela league ngaihven hlawh ber English Premier League chu a hmawrbawk a ni dawn ta. Khelh 38 khelh turah khelh 37 khelh tawh a ni a, Manchester City chu an champion tawh a, Manchester United pawhin pahnihna an luah nghet tawh. Zanina EPL en chak awmna em em chu club lian pathum; Chelsea, Liverpool leh Leicester City ten Champions League khelh an inchuh tur chu a ni.

Tutenge Champions League khelh inchuh

    Season dangah chuan tun ang hunah chuan Champions League khel tur club a chiang tawh thin. Tun season erawh club dangte a rawn chet that ve em avangin a hmawr bawk zanah chauh kan hre dawn. Pathumnaa awm mek Chelsea hia point 67 an hmu mek a, palina leh panga awm Liverpool leh Leicester City hian point 66 ve ve an hmu. An ni pathum hi UCL khel thei vek, khel lo thei vek an ni a, zaninah a chiang ang. Paruknaa awm mek West Ham tan erawh beiseina a awm tawh lo.

    Chelsea-in Aston Villa an tum dawn a, Leicester City-in Tottenham an tum dawn a, Liverpool-in Crystal Palace an tum dawn bawk a. Hetia thlir mai chuan Leicester City dinhmun hi a him lo ber mai awm mange.

    Match hmasaah Chelsea hian Leicester an hneh a, hei avang hian inrintawkna an nei ang. Mahse, an midfielder hmasawn mek Kai Havertz hi a khelh theih dawn leh dawn loh a chiang lova, a khel thei lo a nih chuan an tuar deuh mai thei. Mahse, Chelsea hian playmaker Mason Mount an neih avangin a laiah chuan harsatna an tawkin a rinawm lohva, tun season goal 6 khung tawh Timo Werner khelh that zan a nih chuan hnehna an chan mai chuan a rinawm. An tum tur Aston Villa hi match hmasaah Tottenham hneh thei an ni a, zuam chi ngawt an ni lovang. Aston Villa tan captain Jack Grealish a rawn khel leh thei tawh a, hei mai bakah hian tun season goal 14 khung thei English striker Ollie Watkins an nei bawk.

     Liverpool pawh hian match hmasaah Burnley an hneh a, chak hlim phat an ni a, an phur lai tak a ni. Hetih lai hian goal khung thei tak Sadio Mane aia Klopp-an a rinzawk fo Diogo Jota a inhliam a, mahse, Mane a awm tho avangin tlarhma lam chu an buai a rinawm loh a. Tlarhnung lam mawlh hi ngaihtuahawm an ni leh dawn. Tlarhnung laiah Rhys Williams leh Nathaniel Phillips kan hmuh leh a rinawm a, Fabinho pawimawhna a lang leh dawn a ni. An tumpui tur Crystal Palace hi Arsenal hneh lo hlim an ni a. Benteke leh Zaha pawhin goal an rawn khung chho leh tawh a, Liverpool tana goal pawimawh khung thin Michy Batshuayi a awm bawk avangin an tlarhma lam dan hi thil huphurhawm ve tak an ni a, zuam lutuk chi an ni lovang.

     Leicester City hi Chelsea hneh lo hlim an ni a, an lakah hian pressure a tam bik dawn a. An tum tur Tottenham pawh hi chak lo hlim nimahsela, Son, Bale leh Kane kawltu an nih avangin team hlauhawm an ni. Hetih lai hian James Maddsion a rawn kir leh tawh a, tunlaia form ṭha em em Belgium star Tielemans an nei tih i lo theihnghilh ang e. Tin, Nigerian forward goal thun thei tak Kalechi Iheanacho an kawl bawk a, a ni hian goal 12 a khung tawh a, Mane leh Firmino te aiin a khung tam a nia.

Pet goal tam ber pawh kan hmu dawn

    Tin, zanin nghahhlelhawm na em em chu top scorer la chiang lo leh a tawp zana chiang tur chauh hi a ni. Spurs striker Harry Kane leh Liverpool Forward Mohamed Salah te hian goal 22 ve ve an khung a. Tunge top scorer tur zanin hian a hriat ang. Tottenham striker hian Spurs chhuahsan a duh nia tarlan a ni a, trophy chawi dawn lo mahsela top scorer nihna nena chhuah a duh ngei ang. Mohamed Salah pawh hian 2018/19 a top scorer a nih hnua top scorer a nih leh theihna chance hi bawhpelh a tum hauh lovang.