VAWIIN NI 9.05.21 A LAWNGTLAI BAKAH MIZORAM A THILTHLENG PAWIMAWH ZUALTE

Lawngtlai 09.May,2021:   Vawiin Ni 09.May,2021 hian Pathianni a ni a. Covid-19 thawhhnihna a lo thlen hnu a, kan inkhawm theih loh Pathianni vawithum a lo ni ta reng mai. Eng pawh nise, Covid-19 hri laka kan buaina te a reh theihna turin i tawngtai mawlh mawlh mai ang u.  Vawiin a Lawngtlai khawpui leh Lawngtlai District chhungah thil pawimawh thleng a awm lutuk lem lova. Mahse, kan District chhung ni kher lo pawh vawiin atang chuan kan han telh leh ngawt mai ang e.

1. Vawiin Ni 9.May,2021 hian vanduaithlak takin Covid-19 avanga nunna chan pathum Mizoram-ah kan nei ta tlat mai. Mizoram bik-ah ni khat ah Covid-19 avanga nunna chan an tam ni ber a ni hial mai thei a ni. Chung  mite chu 

i) Pu Bawihluta (82) Thakthing Veng a ni. Covid-19 Pneumonia vangin a boral tih a ni.

 ii) Pu Lallunghnema (86) N.Lungpher khua a ni a. Vawiin tlai dar 4:35 khan a boral a. Zanin hian an khua panpui nghal a ni ang.

 iii)  Pu Lalneihliana (87) Bethlehem Vengthlang niin Dar 3:50 khan a boral bawk. An vai hian Kum 80 an chuang vek an ni.

2. Vawiin khan Lawngtlai khawpui chhung Veng 12-a Covid-19 Executive duty te chuan dan bawhchhia mi 21 manin, heng an mi mante hi pawisa Rs 2,100/- chawi tir an ni.

3. Vawiin hian Lawngtlai District-a Covid019 positive enkawl dam mi 12 chhuah tir an ni.

4. Vanduaithlak takin Lawngtlai District-ah Covid-19 positive hmuhchhuah thar an awm leh ta. Mipa pahnih leh Hmeichhia pahnih an ni a. Kamalanagar-III ah mi pahnih, Kamalanagar-IV ah pakhat leh Damdep ah pakhat hmuhchhuah thar an ni.

5. Vawiin khan Lawngtlai District Bawrhsap Dr. Andrew H.Vanlaldika chuan Lawngtlai District in Total Lockdown Guideline kan hman tur ‘Public Notice’ a tichhuak a. Heng a tih chhuah hi tlem kan ti mai thei a. Kan hmanlai atanga thil danglam chauh tarlan a ni.

6. Tunhnaiah phai atanga Khawzawl District-a rawn haw mi pariat (8) chu Covid-19 positive an ni tih hmuhchhuah a ni a. Farmers' Hostel, KVK, Covid Care Centre, Khawzawl Kawnzar Vengah enkawl tura dah luh nghal an ni. Hetiang a nih avang hian Pu Zothanmawia, Deputy Commissioner & Chairman, District Level Task Force on Covid-19, Khawzawl District chuan Regulation 11(1)(b) of 'The Mizoram Epidemic Diseases (COVID-19) Regulations, 2020' tlawhchhanin Farmers' Hostel, KVK Complex chu vawiin May ni 9, 2021 atanga thu leh awm hma chu 'Containment Area' ah a puang.