Rockets 3200 zetin Israel ram an kap. PM Netanyahu-an Hamas leh Islamic Jihad kan bei zel dawn, a ti. Israel a che na tawlh tawlh!
Lawngtlai 18.05.2021 : Tukin zing leh niminah Israel Air Force te chuan Gaza Strip hmuna Hamas leh Islamic Jihad hote la beih chhunzawm zelin, kar kalta atanga Gaza beihna vangin Palestinian 212 thi tawhin, an zingah naupang 61 leh hmeichhia 35 an thi tel a, hliam 1500 an awm ta. Hamas leh Islamic Jihad hotu lawk 20 chuang thah an ni tawh bawk. Thi leh hliam hi Gaza Health Ministry puan a ni. Israel lamah mi 10 thi tawhin, chung zingah mipa naupang kum 5 mi a tel.
Tukin zingah Israel chuan Gaza Strip a la bomb chhunzawm zel a. Nizan 11:30pm vel khan nimin lama Lebanon atanga Israel ram chu rockets 6 hmanga kah a nih vangin, chhanlet nan Israel chuan laipui mu lian chi 22 zetin a vawm let ta dum dum bawk. Israel leh Lebanon ramriah hian UNO sipai, UN Interim Force in Lebanon (UNFIL) engemaw zat an awm mek a ni. Israel chuan Lebanon chhim lam Rashaya al-Foukhar leh Kfar Chouba hmunte a kap a ni. Thi leh hliam erawh puan a ni lo. Lebanon rama Palestinian thlawptuten ranriah Hamas thlawpna an rawn tilang a, an rawn pungkhawm chiam tawh thin a ni.
US President Joseph R Biden chuan, a vawi 3na atan Israeli caretaker Benjamin Netanyahu chu niminah phone-in a be leh a, Israel leh Palestinian inkara inkahhai (ceasefire) a thlawp tih a sawi pui a, mahse, nawrna pek erawh a duhlo. PM Benjamin Netanyahu chuan nimin tlaiah Israeli sipaite hnenah, nasa zawka Gaza Strip a helhote bei turin a la fuih sauh sauh, " Firfiaka chetna chu beih chhunzawm zel rawh u. Israel mipuite him leh thlamuang taka an awm hma chuan, beih zel tur a ni," a la ti chheu chheu mai! US Democrat House member, Somalian - American nu Ilhan Omar-i reuh chuan, President Biden-an inkahhai a thlawp chu fakin, US sorkarin inkahhai nei tura nawrna nasa tak a pe duhlo leh tikhawtlai zel chuan, Palestinian naupangte thihna mai a thlen a ni, a ti.
Sen. Rick Scott, Republican of Florida state, Donald Trump thlawp bur thintu chuan Republican Senators 19 te chuan Israel an thlawp tlat tih sawiin, karleh lamah buaina tihrehna turin hmalak an tum mek niin a sawi. US chu tun tuma Israel leh Palestinian inkar buainaah a inrawlh tha duhlo chu, China leh UN Security Council member thenkhat chuan an dem hle.
Nimin May 17 zingah, Israeli jet fighters ten Gaza Strip-a Hamas hote leiverh (tunnel) 15km zeta sei an bomb chiam a, Gaza Strip hmar lama Hamas leh Islamic Jihad hel hotu (Commander) 9 te chenna in an bomb chhia a, Islamic Jihad hotu lawk (high ranking), Gaza hmar lam bialtu Hasam Abu Harbid an that bawk. Hamas hotu Yihiyeh Sinwar chenna in chu missile-in an kap a, mahse, a Inah nge leihnuai pukah a awm tih a chianglo a ni.
Hamas leh Islamic Jihad te chuan, "Kan sipai huaisen 20 chuang chu ram tan martar-in an thi ta", tih puangin, Israeli sipaite chuan thah tura hming ziak 130 zinga mi engemaw zat, dozen hnih chuang chu, pial lei daiah dah that (eliminated) an ni ta, an ti ve bawk.
GAZA-AH POWER SUPPLY AN TLACHHAM TAN TA
Israel chuan kar kalta Thawhtanni (May 10) atangin Hamas leh Islamic helten Jerusalem, Haifa, Tel Aviv, Ashkelon, Beersheva khuate rockets hmanga an rawn kahna chu nasa taka chhangletin jet fighters 160 hmangin a la beilet reng a. Hamas leh Islamic Jihad te lahin rockets hmangin Israel ral an la kap zel bawk si. Indona lian zawk (fullscale war) a tihchhuah mai hlauhawm khawpin an inkar boruaka la trangin, a la lum chho hle zel a ni. Israel chuan, "Palestinian helte chuan rockets 1500 in min rawn ral sai tawh a, hetianga an chet hmain rockets 15,000 zet an lo chhekkhawl tawh a ni", an ti. Israeli caretaker PM Benjamin Netanyahu chuan Sunday khan mipui hriatah thusawiin, "Tha pui thawh" (full-force) in kan bei zel dawn a, hun a la duh deuh ang. Hamas hote chuan an thiltih man hmuin, a man sang tak an pek an ni ang", tiin Palestinian helte beihletna kal pui zel a nih tur a puang a ni. US President Joe Biden chuan, " *Israel chuan mahni inveng turin dikna a nei*," tiin a tan hle. Chutih rualin Palestinian mipuite tawrh tirlo zawnga che turin a duh tih a puang.
Antony J. Blinken, US Secy of State chuan Nordic ram, Europe tlawh mekin, Copenhagen khawpui Norway-ah news conference ah Israel chu a thiltih mek chawlhsan tura nawr an tum hranpa lo tih sawiin, Israel chuan mahni inveng turin dikna a nei a, lehlam pawl ringawt nawr zawnga inkahhai rawt chu an tumlo tih a puang. Antony Blinken chuan Dy Secy of State for Middle East Region Hady Amr chu Jerusalem leh Ramallah, West Bank-ah Zirtawpni khan tirlutin, Israel leh Palestinian hote inkara remna palai hna thawkin, Ui leh Kel thlun pawlh in ngeihlo ang maia awmte chu inkahhai (ceasefire) siam turin emaw, inremna tur kawng a dap pui a ni. The Associted Press chuan, "Biden Admin hian Hady Amr, Dy Secy of State for Middle East chu Middle East biala a tirh luh anih hian eng thuchah nge a ken puanzar a ni lo", a ti. Antony Blinken chuan a Pu Biden angin Israel chu a tan hle. Blinken chuan Inrinni liamta maia Israel sipaiten Gaza Strip a In chhawng sang tak pakhat, The Associated Press leh Al Jazeera News ten an luah mek al-Jalaa building, chhawng 11 a sang an kap chim vek chu, sawi chhuakin, Hamas Operation Systems a awm ngei em? tih a chianglo, tiin demna tawngkam deuh a sawi chhuak thung. Israel chu Independent Journalists leh Media te laka che fimkhur turin a duh tih a tarlang. Khawvelin Israel sipaiten Media-hote inkulhna an kap chim chu an dem hle a ni. Human Rights group hrang hrang leh AP News chuan thil awm dan chhui chiang turin, Secy of State Blinken chu an ngen a ni.
The Associated Press hotu, Chief Executive Officer Gary Pruitt chu Antony Blinken chuan biain, an Office tihchhiat pawi a tihzia leh tawrhpui thu te, indona muala che tla thin Independent Journalists leh Media organizations a thlawp tlat tih a hrilh.
Israel sipaite chuan, "AP News leh Al Jazeera News te Office luah, building sang tak chu Hamas Intelligence Operations tih velna hmun a ni a, ralthuam leh tanhmun an relna hmun a ni. Kan bomb chhiat hmain mipuite himna turin hun kan pe lawk a, in saseng vat tura hrilh an ni a, hemi chhungin Hamas leh Islamic Jihad hoten an bungrua an thiar chhuak hman a ni. Mipui tihnat kan duh love", an ti. Warning an pek hnu 15min vel hnu lawkah F-16 fighter jet hmangin, missile 3 in kap chi zui ta a ni.
AP News hotu Gary Pruitt chuan, "Israel sipaiten AP News leh Al Jazeera News office luah lai an bei ta mai hian min barakhaih hle mai a. Khawvelin Gaza Strip thil thleng chu an hre tlem dawn ta a ni. Tlema tlemah nun kan chan phah teuh hle", tiin US State Dept chu thil awm dan enfiah turin a ngen. *Mi thenkhat chuan AP News leh Al Jazeera News te hian Israel lam thil thleng aiin, Gaza lam ringawt thuthar an ziak uar deuhvin, hleih nei (bias) ah an ngai ve thung a! Mahse, AP News hi chu khawvel Media-ah lai (neutral) berah ngaiin, news chu a nih anga ziak mai thin an ni. Al Jazeera erawh chu Qatar ram sum thawh hmanga siam a ni. News Report-ah tan bik nei a, hleih neih (bias) chu a thalo a ni.
US President Joe Biden chuan Palestinian Authority President Mahmoud Abbas pawh vawikhat chu a be tawh a sawiin, Hamas leh Islamic Jihad hote leh Palestinian hote chu buaina tipunlun leh ti so sang zel lo tura bengdai turin a hrilh, tih a ni.
Israel chuan Gaza hmuna Medical Doctor pahnih chu Sunday khan an chenna In an kahsak vangin an thi a, chungte chu Psychatric Neurologist Dr. Mooein Ahmed al-Aloul (66) leh Dr. Ayman Abu al-Ouf te an ni. Dr. Al-Ouf chu Internal Medecine thiam, Al-Shifa Hospital, al-Wahda Dist., a awm niin, a chhungte nen missile kah vanga building chimah an thi a ni. Reporters Without Borders leh Amnesty International chuan Israel thiltih dan chu " War Crime" dik tak a ni a, International Criminal Court-in chhui se, mawhphurtu hrem rawh se, an ti. Doctors Without Boders te pawhin Israel thiltih an dem hle. RSF Secretary General Christophie Deloire chuan, medics hote beihna an dem hle tih a tarlang. Israel chuan, " Hamas leh Islamic Jihad helho kan bitum ber a. An inrelbawlna chhut chhiat kan tum a, mahse, mipui zingah inhumhim nan an awm a, human shield atan mipui an hmang a ni," tiin an puh let ve thung. Palestinian Foreign Minister Riyad al-Malaki chuan, Israel ten war-crime an ti ngei a ni, tiin UN Security Council-in titawp rawh se, a ti.
Israeli Defense Force (IDF) te chuan nimin May 17-ah, Gaza Strip a Hamas leh Islamic Jihad hoten leihnuai an verh (tunnel) , Israel nena indo huna bihrukna hmun tura an siam "The Metro" an tih 15km bakah, firfiakte chetna hmun bitum (target) bik 35 neiin an bomb leh nghek mai a ni. Mahse, IDF te chuan leihnuai hmun an siam zawng zawng erawh tihchhiatsak chu an tum ber nilo a sawiin, Check Points leh hmun pawimawh zual (major junctions) chauh kan tihchhiatsak a ni, an ti.
HAMAS HOTU-IN TLAWM MAI A DUH RIH LO
Qatar rama raltlan (exile) mek Hamas hotu ber Ismail Haniyeh chuan Reporters te hnenah, Palestinian mipuite thiltih an thlawp tlat tih leh, Israel ram chhung rockets hmanga kahna chawlhsan mai an tumlo tih a sawi. Ismail Haniyeh hi UN, Russia, Egypt leh Qatar ram aiawhten an be tawh a, Hamas-ten an chet dan chawlhsan turin leh Israel nen inkahhai nei turin an nawr a ni. Lebanese tawng al-Akhbar Daily news chuan, "Ismail Haniyeh chuan, Israel ten East Jerusalem a cheng Palestinian chengte hnawh tiau an tumna chu a dodal tlat thu leh anmahni avangin tuna indona hi a awm a ni" tiin, Palestinian mi 58 te chenna in leh lo ram chhuhsak tumah Israel an puh a ni.
Gen. Abdul Fatteh el-Sisi, Egyptian President chuan, Israel leh Hamas leh Islamic Jihad hote inkara indona chu tihtawp hman hmawh a tul a ni, a ti. Egypt hi Arab ram si, Israel nena remna thuthlung lo siam hmasa leh, hetianga Israel leh Palestinian inkara buaina leh indona chhuah chang pawha remna kawng (truce) zawngtu palai rinawm tak lo ni tawh thin a ni. Achang chuan Israel lamah a tang hle emaw tihturin, an ram thunun lai Sinai Peninsula atanga Gaza Strip luhna te chu Israel duhdanin a khar (block) fo thin bawk.
Sunday-a UN Security Council meeting, a vawi 3na atana Israel leh Palestinian inkara buaina chhuak mek tihtawp tumnaah US chuan China, Norway leh Tunisia ram duhdana thupuan (statement) siam tumna chu a hnawlsak leh a, Biden Admin chu Israel tan lutukah an puh a ni. Linda Thomas - Greenfield, US Ambassador to UN chuan, "Remna kawng zawngin chawl hauh lovin theihtawp kan chhuah reng a. Indona chu inbiakna (diplomatic) hmanga chin fel tur a ni, a ti. UN Security Council member zinga ram 8 Foreign Ministers leh palai (diplomats) te chuan thuchhuah intawm siamin, Israel leh Palestinian inkara buaina chu tihtawp thuai a ni tur a ni", an ti. Mahse, Myanmar buaina chungchanga China leh Russia ramten Myanmar sipai (Tatmadaw) sorkar an venghim a, an thlawp tlat angin US chuan Israel chu UN Security Council-ah a hum tlat ni berin alang. US Democrat Senators 26 te chuan, President Biden chu nasa zawka Israel ram nawrna (pressure) pe turin an phut a ni. Sunday-ah ringawt pawh Palestinian mi 42 in an thih phah a, hliam 1 a awm. Israel chuan Gaza atanga rockets an rawn kah chhung chu beihlet zel tumin concrete building sang, chhawng 10 chin te, leihnuai verh leh Palestinian helhote mimal In thlengin jet fighters hmanga missile-in a la kap chim rem rum zel a ni.
US House member thenkhat chuan Biden Admin chu Israel hnena ralthuam hralh thin chu ennawn an phut a. US$ maktaduai 735 man ralthuam chu Israel hian America atangin a chawlut a, chung chu Joint Direct Attack Munitions (JDAM) an tih, tum tak kap fuh siah siah theih tura precision - guided missile an tihte chu Israel hian Gaza Strip beih nan hmangah an puh. US chuan kum tin Israel ram chu US$ tluklehdingawn (billion) 3.8 tanpuina (aid) a pe thin a ni. President Biden chuan, "Israel leh Palestinian hote chu zalen leh him leh thlamuang takin an cheng ho thei a ni", tiin Muslim chawnghei tawpna hun Eid hunah buaina siamlo tura ngenin a sawm a ni.
Turkish President Recep Tayyip Erdogan chuan, Israel hoten Palestinian mipui a huhova an thahna (massacre) chu tihtawp thuai tur a ni, tiin *Pope Francis* chu inrawlh a, Israel chu an thiltih chawlhsan tura hrilh turin a ngen. Turkey ram hi Hamas hote thlawp burtu, Israel nen an inkar boruak hi a tha ngai lo.
PALESTINIAN TANTUTE AN PUNGKHAWM MUP MUP
Sunday khan khawvel hmun hrang hrang Montreal - Canada, New York, Chigago, Lebanon, Jordan-ah Palestinian thlawptute pungkhawmin, indona tihtawp leh East Jerusalem lama Israel sorkar chet dan tihtawp an phut a. Montreal khawpuia Israel thlawptu leh Palestinian thlawptute inphek sualin, buaina a chhuak a. Candian PM Justin Trudeau chuan, mi tinin an lungawilohna lantirna tilang turin dikna an nei a, mahse, Juda huatna (anti-Semitic) leh Muslim hlauhna (Islamophobia) an nei tur a ni lo, tiin "Buaina siamtute dim dawih an ni lovang", a ti.
Bosnia & Herzegovina President Sefik Dzaferovic chuan Israel thiltih demin, Gaza a mipui tawrhna chu enliam ngawt chi a ni lo, tiin Foreign Minister Bisera Turkevic pawhin Israel chuan Gaza a beihna a chawlhsan tur a ni, a ti. Bosnia ram chuan hetianga jet fighters hmanga in bomb ul ul hi, Yugoslavia buai lai khan tawn hriat nasa tak an lo nei tawh thin a ni.
SUNDAY-A THIL THLEN DAN TLANGPUI
May 16 Sunday zing khan Israel indo thlawhnate chuan Gaza hmuna mipui chenna building an kap a, kum 2017 atanga Hamas Political Wing hotu pakhat Yehya al-Sinwar chenna an bomb a ni. Tin, a bula Refugee camp kah niin, Palestinian 10 an thi a, naupang 8 an thi tel. Hetih laiin Tel Aviv leh Haifa lamah Hamas hoten rockets an rawn kah ve tho vangin ralkhel dar vuak rik chuah chuah deuh reng a ni. West Bank-ah Palestinian mi 15 in an thih phah bawk.
Gaza khawpuia kawngpui thenkhat chu Israel indo thlawhnate missile kahna avangin a khi chat riah ruah a, kal vel a harsat phah, an ti. Wafa news chuan, hospital lian ber Al-Shifa Hospital pawh pan a harsat phah hle, a ti. Rimal khuate pawhin electric eng an nei lova, tui supply harsa tanin, zan lamah a thim mup tawh ni awm e.
Jen Psaki, White House thupuangtu leh US State Dept thupuangtu Ned Price te chuan East Jerusalem atanga Palestinian nek chhuah tumna chu, mi thenkhatin chi thenfaina (ethnic cleasing) tia an puhna chu dodalin, ethnic cleansing a ni lo ve, tiin Israel an tan hle. Sunday-a Muslim chawnghei chunga thla serh tawpna nia White House a chawhlui kilhona tura tih chu Council on American Islamic Relations ten an boycott a, tin, Eid awm tur chu Palestinian thlawpna entir nan American Muslim hote chu an tel duhlo. Gaza Strip hmuna UN Refugee enkawltu hotu Mathias Schmole chuan, a chenna bul hnai building awm te chu Israelten an bomb nia sawiin, a, hlauhawm ther ther hle, a ti.
Brig. Gen. Hidar Zilberman, Israeli Army thupuangtu chuan Israeli Army Radio hnenah, "Khan Younis khua, Gaza chhim lama Hamas hotu Yehiyeh Sinwar chenna In beih a ni a, a chenna In hi a unaupa nena an chenna a ni mai thei", a ti. Inrinni khan Hamas hotu tho Khalil al-Hayeh in pawh an lo bomb chhe tawh bawk. AP News chuan a unaupa Mohammad nen an awm a, Khalil al-Hayeh chu a thih leh dam hriat a ni lo. Leihnuai verah a tawmbo pawh a ni thei, a ti. Sunday bika Israel sipaite chetna chu kar khat chhunga an chet nat ber tum a ni.
AN VA THI TEUH EM! A HLAUHAWM THER THER E
Israeli Intelligence te chuan Gaza khawpuia The Associated Press leh Al Jazeera News/TV crew ho inkulhna Al-Jalaa building chhawng 11 zet asang atangin Hamas leh Islamic Jihad hoten ral beih dan relin, an hmang ve tih report an dawn chu bawhzui vatin, chhawng 11 a sang chu missile hmangin kah chim rem rum a, meivap leh vaivut maia chantir tul tih an hria a. He building hi Apartment niin, a lo berah mi 60 an cheng ni. Israeli sipaite chuan, Inrini khan 10min chhunga inthiar fihlim turin phone hmangin an hriattir a. Dar 3:12pm (local time)-ah an kap chim vek a ni. al-Jalaa Building a cheng ve Youmma al-Sayed chuan, "10min chhung leka tlan chhuak turin baklengin, a biling a balangin, naupang pawmin ka tlan chhuk a, kan thi lo chauh a ni", a ti.
AP Journalist hoten, 10min ni lovin 15min tal hun pe turin Israeli Intelligence Officer chu hun an dil leh a. In neitu Jawad Mahni pawhin hun pek belh turin a dil bawk. Mahse, Israeli Intelligent chuan, " 10min bak a awm lo, lo inthiar fihlim turin kan hrilh tawh che alom" tiin, Jawad Mahni chuan, "Kan dilna te, kan hriatrengna te, kan nunte intichhe vek ang. Engvanga kan In chu bei duh nge in nih? Pathian a awm asin" a tih chuan Israeli Intelligent chuan, "Hamas Intelligent te an awm reng a ni", tiin a chhang a ni.
AP Journalist Fares Akram chuan, "Zankhuain report siamin ka buai a. Chumi hnua chawlh hahdama ka mut zal lai takin, ' Inthiar chhuak thuai rawh u' tiin an rawn au ta thut si a. Dawhkana ka Laptop, Camera leh Electronic bungrua awm ang angte chuhin, theihtawpa chakin ka tlan chhuak ta a, ka Car-ah ka lut fel tihin, F-16 jet fighter hmangin kahchhiat a ni ta a ni, " a ti. AP News hotu Gary Pruitt chuan, "Kum 15 zet he building kan lo luah tawh a, Hamas ho an awm reng reng kan hre ngailo", a ti. F-16 jet hian missile 3 hmangin al-Jalaa building hi a kap a ni. Israel chuan May 13 khan Mayadeen Media group awmna Shorouq building pawh meivapah an lo chantir tawh a. Kum 2014 a an indo hnuah, 2019 khan al-Jalaa buildingah an insawn lut a ni. Tunlaia Israel leh Hamas/ Islamic Jihad te inkara indona chuan reh lam a la pan thei rih lo a ni
- CT LALRINAWMA
Post a Comment