SERCHHIP BIAL MIPUI TEN POLITICS DIK TAK AN BUAIPUI TA!
Tluangtea Hnamte
2 Tomir Thla, 2021(Pathianni)
Eng nge ni Politics chu?
Ram leh hnam inrelbawlna. Hei hi a tawi thei ang bera politics ka sawifiah thiam dan chu a ni.
Mizo nawlpui thinlungah erawh chuan Politics hi ; thudik chanve hmanga inbum kuala dawt sawi hreh lo apiang ten, mipui vote hmanga lalna leh thuneihna an chan a; mipui sum hmanga nâwmsak bâwlna hmanraw pakhat ang chauh hian kan ngai ni berin a hriat!
Hetiang hi mi nawlpuiin Politics chung changa kan rilru put zia a nih miau avangin, kan thlan tlinte laka kan beisei ber pawh ram leh hnam hmasawnna tura hnathawh tir lam ni lo vin, an sum bâng nawi hmanga kan sahmim tihpuar ve a ni. Heng vang hian a lawm mizote zingah, "Politics chu mi tamtak buaipui, mi tlemte ten an hlawk pui", tih tawngkam pawh hi a lo chhuah hial ni!
Hetiang hi politics kan hriat thiam dân leh kan buaipui chhan a nih tlat avangin, mipui vote hmanga sawrkarna siamtute lam pawla tel ve nih chu khaw thenawm tournament-kal tuma champion kan khaw 'A' team zinga tel ve tluk zeta thil thlakhlelhawm a ni lo thei ta thin lo a ni.
Mizo ten hetiang tak maia politics kan pawngsual thin avang hian a lawm, a kul a taia politics muala chetla tlangnel thinte chu eng ang mi pawh ni se, kan hmuh sir he hu lo theih thin loh ni!
Chutiang a nih laia Serchhip Bial Assembly Constuancy Bye-Election neih zawh taka, an bial chhung ênkawltu atana sawrkarna fawng vuantu an nih avang maia, sawrkar lai bawh huam huam ringawt lo va an bial chhung tan mai ni lo, ram leh hnam inrelbawlna hna thawk tlak nia an ngaih avanga, sawrkar lai paih thlaa êptu lam hneh tak maia an han thlang tling ta mai hi a mak a. Mizoram Politcs chanchinah bung thar min kai pui hial lo maw? Mahni mimal hlawkna ûm lo va, mi dik leh tha nia an hriat hnena an vote hlu tak an pe ngam hi, SERCHHIP BIAL MIPUITE hian POLITICS dik tak an buaipui ta a ni ka ti lo thei lo a ni.
He mi avang hian Serchhip Biala party dang zawng aiawha Candidate-te hi "Mi tha lo an ni", ka ti a ni lo. An mimal chhungkua hamthatna tur atana belhfakawm zawka lang sawrkara a fawng lam vuantu hnawla, a thulo leh thiltheilo zawk tura ngaih an chunga hotu atana hnehsawh tak maia an han thlang tling tlat mai hi chu; Mosia iangin hmuh theih loh hmuh an nei a ni ngei ang.
Post a Comment