April 29, 2021 a Ngengpui Wildlife Sanctuary Saiin a beih avanga nunna chan ta Pi Hnianghniangi leh a chhungte thlavang hauh nana Hmunnuam JAC ten thuchhuah an siam chu DCF, Chhimtuipui Wildlife Division chuan kan hmu ve lo a ti.
Hmunnuam JAC ten May 1, 2021 khan Pi Hnianghniang Sanctuary Saiin a beih avanga nunna a chan avang hian he Sai hi May thla chhung that emaw lasawn turin sorkar an ngen a, mitthi chhungte chu zangnadawmna pe turin leh mitthi pasal chu a phu tawk sorkar hna pe turin sorkar an ngen bawk. He an ngenna hi sorkarin a tihhlawhtling lo a nih chuan a tul anga hmalak an tum bawk.
DCF, Chhimtuipui Wildlife Division chuan Hmunnuam JAC te thuchhuah hi a copy kan hmuh loh vangin kan hre lova, social media kaltlangin kan hmu a, a hmunah kalin Pi Hnianghniangi thihna hi Sanctuary chhung ngei a ni tih kan fiahfiah a ni a ti a. He lehkha hi an pute hnenah thleng tur a nih avangin Chhimtuipui Wildlife Division chuan sorkar hmalak tum dan an hre lo tih a sawi a. Tin, an thuchhuahah hian signature a awm lova, hei hian ngaih pawimawh a hlawh dawn em a hriat loh thu a sawi a. Mitthi chhungte chu an tawrhpui takzet thu a sawi bawk.
Hmunnuam JAC hruaitu atanga thudawn danin, Sai hi Sanctuary Sai ngei a ni a. Sai hi Sanctuary pawnah lo chhuakin Pi Hnianghniangi a um lut niin a sawi a. Sialphei lui hi Sanctuary chhung vek a ni lova, a hnar lam hi Sanctuary pawn a ni a, a mawng lam hi Sanctuary chhung a ni. Sialphei lui hnar Sanctuary pawn atang hian Sialpheilui mawng lam, Sanctuary chhungah Pi Hnianghniangi hi a um lut niin a sawi. Sactuary tih hriatna tur fencing emaw Pillar emaw helai hmunah hian tar a ni lo a ti bawk.
Tunah hian he Sai hi Sanctuary pawn, Sialphei lui hnar lamah a la awm niin an sawi bawk.
Post a Comment