SAVUN KAWRFUAL ZIAK TU REV. LALHMINGCHHUANGA ZONGTE ICU-AH ENKAWL MEK A NI, AN TAN TAWNGTAINA I LO HLAN VE THEI EM?
- Vanneihthanga
Savun Kawrfual lehkhabu ziaktu Rev. Lalhmingchhuanga Zongte hi Delhi-ah Babtist Filed Director niin an chhungkuain an awm mek a. A nupui Pi Laldawngliani nen fa pathum; hmeichhia pahnih leh mipa pakhat an nei a, an an fa te ber hi mipa rawlthar kum 16 mi a ni.
An fa u ber nula chuan pawn lamah hnathawh nei ve tawhin, a ni hi an chhungkaw zinga covid 19 positive hmasa ber a ni a, an chhungkuain an kai ta vek mai a ni.
An fate hian an la na lutuk lova, an nupa erawh chuan an la na deuh viau a. Delhi khawpuiah hri vei an tam avangin duh angin damdawi in chan zung zung a harsa a, in lamah an theih ang angin kar khat chhung vel an inenkawl hman a ni. An natna chuan zual lam a pan tak zel avangin kar kalta April ni 26 khan Delhi-a Fortis Hospital-ah admit an ni ta a ni.
Rev. Lalhmingchhuanga Zongte hian Mizote'n khawvel hmasawn mekah, hnam anga kan mamawh chi hrang hrang a thai lanna 'Mizo Buanpuite' tih lehkhabu a buatsaih fel leh tawh a. A lehkhabu thar chu kei tehlul hi relese turin min rawn sawm ta tlat mai a! An ni ang mithiam leh mi ril lehkhabu release tur chuan tling tawk ka in ti lova, ka hnial viau pawhin a tih ve tlat mai si. A mi beiseina hi ka theih ang tawka tih hlawhtlin sak chu ka bat niin ka hre ta a ni. A lehkhabu pawh min rawn thawnin ka lo belhchian ve mek laiin, covid 19 thawhhnihna a rawn thleng a, lehkhabu tlangzarhna boruak a awm thei ta si lo! "Boruak ngaihchan phawt nise" kan ti a. Ka whatsapp message a reply lo vang vang a, mak ka tih rilruk deuh viau laiin, hri leng an lo kai ve a ni tih vawiin tlai khan ka hre ve ta chauh a ni. Rev. Lalhmingchuanga te chhungkuain covid 19 an kai a, amah phei chu ICU-ah enkawl mek a nih thu ka han hriat chuan ka thin a thawng hle mai!
Rev. Lalhmingchhuanga Zongte te chhungkaw dinhmun hi chiang deuh zawka hriat ka duh a, amah nen bak kan inbiak ngai loh avangin vawiin tlai khan a number chu ka call risk ta tawp mai a. Chau tak chungin ka call min rawn reply thei a. Ka call a reply theih avangin ka va han lawm teh reng em!
Rev Lalhmingchhuanga Zongte hi a chuap lehlam lehlamah pneumonia a lo nei tawh a. Oxygen tel lo chuan a awm thei lo. Engemaw lai khan a oxygen level a sang hlei thei lova, tunah erawh chuan a pangngai viau tawh niin an sawi.
A nupui Pi Laldawngliani hi chu a dam tha viau tawh a, tawng thiam tak a ni a, an pa hnaiha awm a duh rih avangin damdawi in hi a la chhuahsan duh bik lo. Zanin lamah hian a chhuah theih beisei a ni.
Rev. Lalhmingchhuanga Zongte hi a thu ziak chhiar tawhte chuan, khawvel hmasawnna kawl eng hmu phak ve mek, hmasawnna tur tam tak nei, Zofate hian kan la mamawh ngawih ngawih tih kan hrethiam vek awm e.
A lehkhabu ziah hmasak, 'Savun Kawrfual' publish tu Ophel neitu Pu Mawia leh Pi Kimi te hian Rev. Lalhmingchhuanga Zongte hi an buaipui nasa hle mai. Tuntuma harsatna an tawh mekah pawh hian an ngaihtuahna zawng zawng an seng a ni. Lehkhabu thar 'Mizo Buanpuite' tih pawh hi Ophel hian hlawkna engmah um lovin an publish sak leh dawn a ni.
Amah leh a chhungte tan he hripui laka an lo damchhuah ngei theih nan tawngtaina lo hlan ve hram ang che. 🙏
Post a Comment