Pakistani Rangers te chuan inkahhai thuthlung bawhchhiain Jamu & Kashmir International border-ah India lam hawiin nimin khan silai an hmetpuak niin Border Security Force te chuan an sawi.
Ram pahnih inkara silai puahna hmun hi Jamu & Kashmir-a Samba district chhung niin sipai thi leh hliam an awm thu tarlan a ni lova, BSF thupuangtu chuan tun tum hi Pakistan-in kumin February 25-a inremna thar an ziah hnuah inkaihhai an bawhchhiat lehna hmasa ber a nih thu a sawi. "Pakistan Rangers te hian Ramgarh sector-ah India lam hawiin zing dar 6:15 khan silai an pawng kah," tiin Inspector General of BSF, Jammu frontier, N S Jamwal chuan a sawi a, Pakistani sipaite hian patrolling an neih laiin fencing bul hnai an thlen hian silai hi an hmetpuak ta tih a sawi. India leh Pakistan te hi ramri hnaiah a khat tawkin an in kapreng thin a, thi leh hliam pawh thahnem tak an awm tawh.
Kumin February thla khan ram pahnih sipai hotute chuan inremna thar siamin Line of Control-ah a tu ve ve mahin silai hmehpuah loh nise an ti a, hei hi a hmalam chuan khauh taka kenkawh a ni reng thin. Hemi hma 2003 pawh khan inhahhai thuthlung hi an lo ziak tawh bawk a, mahse lehkha lamah an vawng chungin a takah erawh ram pahnih sipaite hi a khat tawkin an in ralsai reng a ni.
Post a Comment