Lawngtlai 3rd May, 2021 : Mizoram-ah kum nga kalta chhung khan April thla chinah kumin 2021 hi ruah tui tlak chhiat ber tum a ni a, chuti chungin kum dang zawng aiin khua lum tehnaa chuan a la hniam ber kum a ni.
State Meteorological Centre, Directorate of Science and Technology chhinchhiah danin, kumina khaw lum lai ber hun hi April 24, 26 leh 27 khan thlengin temperature 33.5°C a ni a, kum nga kalta chhunga khaw lum ni ber chu April 13, 2017 niin hemi ni hian 36.5°C a tling. Kum 10 kalta chhung khan tum 7 ngawt April thlaah khawlum ni ber hi a thlen laiin 2010 erawh March 25 ah hemi kuma khaw lum ni ber a thleng a, temperature-in 34.1°C a kai. 2011 khan September-ah kum khata khaw lum ni ber thleng ve lehin 33.2°C a ni thung. Hetih lai hian 2019 khan khaw lum ni ber hi May 13 kha niin 36.0°C zet a tling a, kum dangah chuan kum khata khaw lum ber ni hi April-ah a thleng thin thung.
Kumin hian khaw vawh lai berin 9°C a ni a, January 17, 23 leh 25 bakah February 6, 4, 6-10 ah te a thleng tawh. Kum nga kalta chhung khan a vawh lai berin 2.7°C a ni a, January 13, 2017 khan he hun hi a thleng. Kumin hi a vawh lai ber hun atanga teh chuan temperature a tlak hniam loh ber kum a ni rih. Kum nga kalta chhung khan January-ah khaw vawh ber hun hi a thleng tlangpui a, 2019 khan December 22-ah kum khata a vawh lai ber hun a thleng thung.
IMD-in fur (June-September) chhunga ruah tui tlak dan tur thlirlawkna (long range forecast for the 2021 Southwest monsoon season rainfall) a tihchhuahah kumin fur lo thleng tur hi India ram pum ang chuan ruah tui tlak dan pangngai (normal i.e., 96% to 104% of Long Peiord Average) ni tura ngaih a ni a, Mizoram-ah chuan ruah tui tlak dan pangngai pha lo (below normal i.e., 90% to 96% of Long Period Average) tura ngaih a ni. India khaw chhak leh hmar chhak lamah long period average hi 143.83 cm a ni a, IMD thlirlawkna ang chuan kumin fur chhungin Mizoramah 1294.47 mm atanga 1380.77 mm inkar vel ruah tla tura ngaih a ni.
Post a Comment