Facebook’s Oversight Board chuan facebook leh Instagram-in Donald Trump duh lova an hnen atangin an paih chhuah tawhna vawiin khan a thlir let leh a, kengkawh zui zel tura a tih rualin hma an lak dan erawh a sawisel.
Khawvelah Facebook hmangtu tluklehdingawn 1.7 vel an awm a, he social media kal tlang hian inhnialna leh inhuatna tawngkam uchuak hman anih tin bakah thu dik lo theh darhna hmanrua a nih fo avangin, mi thil chik mite chuan khawvel pumah mihring dikna chanvo palzut leh inrikrapna kawngah mawhphurhna thui tak a nei tiin an sawi.
Facebook company chungchang avang hian nikum October khan thil thleng leh an hma lakna endiktu tur Oversight Board din a ni a, a nihna hi semi-independent review board a ni a, facebook kal dik lo tur vengtu tur a ni.
Board chuan facebook hnenah lut ve thei ngai tawh lo tura US President hlui Donald Trump an dodalna chu inhremna nihphung pangngai pel ani tih a hrilh a, ennawn turin thu a pek bakah thla ruk chhungin an hnenah chhanna pe ngei turin a ti bawk a ni.
January khan US inthlan result kal zela lungawi lo mipui eng emaw zat Washington khawpuia Capitol Hill-ah dan phal lovin an lut a, buaina siamin chhiatna an thlen a. Hei vang hian Facebook leh a thuhnuaia awm instagram chuan Trump hremin an hnen atangin an nuai bo a ni
Oversight Board chuan Trump-a laka thutlukna an siam dan chu thil uchuak niin a hria a, lut ve thei miah tawh lo tura an hrem nghal ringawt chu ‘Fel fai tawk lo leh changkang tawk lo’ tiin a sawisel a. Facebook hmangtu mi langsar dangte laka hma an lak dan nena inmil zawka thil kalpui turin a duh ani.
Board Co-Chairman Hell Thoring-Schmidt chuan, “Facebook hnenah ngaihtuah nawn leh a, he thila hma an lakna hi lang tlang lehzuala kalpui turin kan duh, Hmangtute zawng zawng inang tlangin en se la, hleihneiin tawrhtir suh se,” a tih bakah, an thutlukna chu Facebook-in tha taka an dawnsawn ngei a beisei bawk.
Facebook chuan chhangin, “board thutlukna an ngaihtuah zui ngei dawn a, chiang tak leh a tha thei ang bera kalpui turin hma an la dawn,’ tih an sawi.
Hetih lai hian Twitter pawhin Trump an nuai bo ve bawk a, thawhlehni khan US President hlui hian amah thlawptute hnena thuthar a hrilh theihna tur leh a ngaihdan a puanzar theihna tur website thar a hawng a ni. Trump chuan board rorelna a hriat hnuah : Facebook, Twitter leh Google thiltih dan zawng zawng hi a zavaiin mawng hlima mualphona a ni,’ a ti.
Post a Comment