ENTAWN TLAK A LO AWM MIAL EM AW?
(Covid-19 hri leng do nan)
Kan chenna khawvel boruak bawlhhlawh tak chuan, mihringte min tibuai hnehin, khawi ram leh hmunah pawh Covid-19 hri leng (pandemic) laka fihlim a awm ta meuh lova, a mangan thlak hle mai.
Kan awmna Cambodia-ah nikum 2020 khan hri leng ve bawk mahse, mi 500 vel bakin an kai lova, thi an awm lo. Mahse, kumin Feb. 20 chhovah a vawi-3na atan, vantlang zinga hri len huk ( Community outbreak) chu Phnom Penh khawpuiah rawn awmin, nitin a punchhoh zel avangin Phnom Penh khawpui chu April 1-14 chhung zan dar 8pm to 5am curfew a ni a, hri pung zel vangin April 14-28 chu Lockdown puangin, May 5 thlengin pawhsei a ni.
Tun dinhmunah Covid-19 chu ram pumah veitu 16,299 awmin, nimin (May 4) ah case thar 938 hmuh leh a ni a, thi 107 an tling ta bawk. Niminah Phnom Penh khawpui bikah positive 608 an hmu. Provinces (state) 25-ah Provinces 12 ah a darh mek.
An PM Hun Sen chuan, an ram retheihzia leh Healthcare system a that lohzia hrechiangin mipuite chu sorkar thuawih turin leh Covid-19 hri do puiah sawmin, " Covid-19 hri leng hi theihtawpa kan do tlan loh chuan, kan thi treuh mai ang. I thawkho ang u" , tiin a sawm uar hle. Sorkar hna thawk leh private/ public works lama thawktute pawh vaccine la duhlo chu, an hna atanga chawlhtirah a vau zui. A ham strict hle!
ENGTIN NGE MIPUIIN AN TIH?
Ka awmna bul lawka Vonida Clinic & Maternity tih chu thawktuten anmahni dawrtu tur reng reng chu, pawnah thutna inhlat deuh siam sakin, gate-keeper ten alcohol hmangin an lo kap/ phuh thianghlim vek a, an temperature endik sakin, an pawisa leh lehkha, etc an ken/ pek pawh kut lawnga dawng lovin, mi pakhatin 3ft vel tiang sei tawpa bawmah chuan a lo dawng a, alcohol hmangin an phuh thianghlim leh vek thin. Chumi hnuah a kut kawr bun hmangin, a khawihin a la chauh thin.
Lockdown karah mipui mamawh lamna/ leina tur Dawr te hawn phalsak an ni a, mipui mimir dawrah te chuan Social distance tih nan, dawr chhung luh theih lohvin hrui lo zamin, a dawrtute kal phal chin siamsak vek an ni! Mipui nawlpui chuan face-mask vuahin, hand-sanitizer burte reuhte an pai tlangpui bawk. Loh theih lohva office, school, bank, mall, mini-mart, petrol pump a thawktute tihtlem niin, chunga thawktute chu inkal chhawk turin an ti a, chungho chuan Pass atan ID Card an awrh vek thung.
Tunge Covid-19 hrik lo vei palh a, pu darhtu hriat a nih mai thin loh avangin, mitin mai chu anmahni tawk theuhvah an fimkhur em em vek mai a ni.
Nangma tan i lo fimkhur thiam khan, i chhungte leh i ram/ mipui tan i fimkhur tihna a ni. Midangte tan i fimkhur khan, nang leh i chhungte pawh an him dam phah dawn bawk a ni. Tul bik thil takah lo chuan, len kuala chhuahvah tam loh chu mimal, chhungkua, khawtlang leh ram tan himna kulhpui ber a lo ni e ! -
Ziaktu : CT LALRINAWMA, COMBIDIA
Post a Comment