Lawngtlai, 2nd May,2021 : Covid-19 vanga Zoram Medical College-a enkawl Mara Autonomous District Council a MDC hlui J.Rawna (64) chu zanin tlai (2.5.21) dar 5:30-ah a thi a, a ni hi Mizorma cheng zinga Covid-19 vanga thi 16-na a ni.
Aizawl Dam Veng Local Level Task Force (LLTF) te chuan April 30,2021 khan J.Rawna hi a pum-ah tui tling siak turin Aizawl Hospital & Research Centre-ah hruai a ni a, Rapid Antigen Test hmanga endik in hri a kai tih hriat chhuah a ni.
J.Rawna'n hri a kai avangin a nupui leh a fate pahnih chu Rapid Antigen Test hmangin endik an ni a, an ni pathum pawhin hri an kai tih hriat chhuah a ni nghal a. April Ni 30 khan J.Rawna chu ZMC-ah dan luh nghal a ni a, Covid-19 hri a kai bakah hian a taksaah harsatna hrang hrang puma tui tling, thin tha lo, zunthlum leh thisen sang nei sa ani a. Tukin zing (2.5.2021) khan a dinhmun a that tawk loh avangin Intensive Care Unit (ICU) ah dah luh a ni a,tlai dar 5:30 khan a boral ta a ni.
J.Rawna nupui leh a fapa te pahnih hi an positive avangin CCC SAI, Mission Vengthlang ah enkawl mek an ni a. An fate dang naupang pathum te chauh In lama awm an ni a. A ruang hi ZMC ah uluk taka pack a ni ang a, a nupui leh a fate en theih turin SAI, Mission Vengthlang ah kalpui a ni bawk ang. Zanin hian Dam Veng thlanmual ah vuiliam nghal ani ang.
J.Rawna hi Kum 2012 khan Maraland Democratic Front (MDF) ticket-in Tokalo Constituency atangin MDC atan thlan tlin a lo ni nghe nghe tawh ani.
Post a Comment