West Bengal inthlan duty a kal Mizoram Police lo haw mi 263 te chu vawiin chhun dar 12:00 khan Thenzawl Police Training School thlengin, hetah hian Thenzawl CHC Sample Management Team leader Dr. Remlalnghaki, Medical Officer hovin Covid-19 an vei leh vei loh RAgT hmangin test neih nghal an ni a, mi 64 test result Positive in, hri an vei tih hmuhchhuah an ni a, mi 199 test result negative te chu PTS a Quarantine Centre ah felfai leh fimkhur taka khunghran nghal niin, ni 7 hnuah TrueNAT hmanga hri an vei leh vei loh enfiah leh an ni ang.
PTS Thenzawl a Principal, Senior SP Pu HL. Thangzuala chuan heng West Bengal State inthlana duty a kal Mizoram Police te hi 1st Battalion MAP, 3rd Bn. MAP, 5th IR battalion a mi leh MPRO a mi an nih thu sawiin, hri vei hmuhchhuah zinga a zatve vel chuan symptoms an nei nia a lan thu a sawi.
Heng Covid-19 hri vei hmuhchhuah thar te hi Serchhip DCHC ah enkawl tura tih an ni.
Hetihlai hian Thenzawl Town Task Force hruaitute chuan Thenzawl ah sample lak tur an tam thu leh thawktu an indaih loh thu leh an hah thu sawiin, vawiina sample laknaah pawh hian a hmaa Volunteer a thawk, chawl tawh te chu tlawmngai tura an sawm thu an sawi a ni.
_
Post a Comment