Tunhnaia kangmei chhuak nasat avangin Lawngtlai District khaw 20 dawn ah kangmei chhuak avangin khawtlang mipuite’n harsatna an tawk mek a. Heng kangmei tawk khaw tam zawk hi chuan an thelhmit tawh niin an in hria a. Nimahsela, thli a tam avang hian thelhmit tawh a, inngaihna khaw thenkhat te chu kangmei hian a lo tihbuai chhunzawm zel avangin, kangmei laka an him theihna tur kawng zawngin mei kawng sial hna an thawk hlawm bawk a ni.
Mizoram sorkar ruahmanna in nimin khan Sangau RD Block chhunga khaw thenkhat kangmei tuar te leh Phawngpui tlang chu kangmei laka him theihna turin India Air Force ten Chopper hmanga kangthelh an tum chu, meikhu a nasat avangin tui an thalna tura an ruahman Tuipui D leh Saisihchhuah lamah te harsatna an neih avangin, IAF lam te hian kangmei thelh an tum chu an thulh a. Vawiin lamah kangmei hian ziaawm lam a pan lo anih chuan beihpui thlak zui leh turin ruahmanna kalpui a ni.
Phawngpui National Park hi a kangmei a hlauhawm avangin Pu Samson Thanruma, Chhimtuipui Wildlife Division a DFC chuan a vil reng a. Tin, Lungpher, Cheural, Rawlbuk leh Siachangkawn khawthlang hruaitute’n kangmei a chhuah lohna turin rim takin kangmei ven hna hi an thawk bawk a ni.
Post a Comment