Lawngtlai/April,29.2021 ; Mizoram sawrkar chuan vawiin Ni 29.April,2021 khan danin thuneihna a pek angin, Lai Autonomous District Council (LADC) ah Mizoram Governor pawmpuina-in nominated seat pali awm tawh tur leh elected seat 25 erawh a ngai a awm turin thuchhuah a siam a, he thu hi chhuah anih atangin hman tan nghal tur ani ang. He thuchhuah ang hian, Lai Autonomous District Council ah nominated seat pathum awm thin chu pali ani tawh dawn a ni.
Mizoram Governor chuan Indian Constitution Sixth Schedule leh Rule 6 of The Lai Autonomous District Council (Constitution, Conduct & Business) Rules,2010 in thuneihna a pek angin Governor in nominated seat hi a tidanglam a. He danglamna hian Lai Autonomous District Council (Constitution, Conduct & Business) Rules, 2010 rule 7-na a nghawng dawn a ni.
Kum 2021 hma lam term engemaw zat chhung chu nominated member chu pali LADC hian a nei thin a. Amaherawhchu, kum 2010-a MDC Constituency siamrem (delimitation) anih khan nominated seat hi pathum ah tihhniam a lo ni ta a ni.
Kum 2020 a 11th LADC General Election neih zawh taka khan MNF party ten hneh takin sorkar-na an siam a. Pu Manghmunga Chinzah CEM kaihhruai sorkar chuan Lai Autonomous District Council ah Nominated seat pathum awm thin chu pali a nih leh theihna turin Governor ah a thlen nghal a. He thil buaipui hian Mizoram Larsap leh Chief Minister Pu Zoramthanga pawh vawi eng emaw zat a hmu tawh a. Mizoram sorkar chuan LADC a nominated seat pathum ni thin chu pali-a a awm theihna turin Governor ah ngenna an siam a. Chu ngenna an siam chu vawiin LADC Day 49-na ah a hlawhtlinna an hmu ta a ni.
Lai Autonomous District Council-a Chief Executive Member Pu Manghmunga Chinzah chuan, Lai Autonomous District Council-in nominated seat pathum awm thin chu pali ah a awm theihna tura an ngenna te tihhlawhtlin sak ani chu lawmawm a tih thu a sawi a, tunah chuan LADC pawh a fuke kim in a awm thei dawn a. Hun rei lo te ah nominated member te pawh hriat a ni thuai ang, a ti.
Tunah hian Lai Autonomous District Council ah hian Elected Member 25 leh nominated seat pathum an awm mek a. Governor atanga phalna an hmuh hnu hian Elected member 25 leh nominated 4 an awm dawn ta a ni.
 |
| Lehkha hmasa siamthatna |
Post a Comment