INKHAWM TUM LO AN AWM ṬAN

 INKHAWM TUM LO AN AWM ṬAN

- David Sailo

Sorkar in khap lo mahse Kohhran ṭhenkhat chuan Inkhawm kal mek an ti tawp tih ka dawng ta nual mai.

A thawh khatna ah kha chuan Chhungkaw Member 2/1 in an kai pawhin an chenpui ngeite, nupa khumkhata mu reng pawh kailo zawk an awm tlat zel. Tun ṭum erawh chhungkaw hung (Colony) a chengte pawh an vai kai phiar phiar ta mai.

Lockdown lo zawngin, Containment Zone/Micro Containment zawngin kan kal dawn a ang ta viau a, kan hri kai pun chhoh dan en hian Biak Inah SOP(Distancing) kan zawm tak tak loh zia a lang a, zawm pawlte pawhin inkhawm banah tal chuan kan ding khawmin kan haw ho leh lut lut tho mai.

A thawh hnihna tir lam khan Ram pawn atanga rawn haw khan 70% an luah a, kan la Control thei a tih mai theih a, tunah chuan vantlang atanga kaina hriat loh leh ram pawn atanga rawn haw atanga kai kan inzat thial thial ta. Community hi a dingchang thuai dawn pawhin a lang.

Lui hnar lamah tui a len tlat chuan a mawng lam chuan a hnu khawiah an tuar ṭawk zel tih kan hria a, nikhatah Nuai 2 chuangin kan kai tawh chuan kan hmabak hi a eng lo tih hriat chian a hun ta hle mai. Quarantine Centre, ZMC khum leh Ventilator dinhmun thlenga kan in dap chian a hun ta hle mai. Kar tir lama nikhata 300 bawr thi kha tunah ni khatah 1000 chuang kan thi leh tlat tawh.

Sorkar a nih rualin mimal mawhphurhna hriat a, hri leng hre reng si, ven ngai, chawitir ngai, man ngaia awm reng hi a changkan loh thlak hrim hrim. Hawh u, vai ho inthlahdah zar hi keini Kristian ram, lehkhathiam tamna ram hi chuan zo tum lovin Sorkar, NGO leh hmalatu te nghak kher lo hian kan rama a ti punluntu ah ṭan i tum lo hram ang u.

Kan inrin leh beisei, kan ngaih hoh ai hian a thawh hnihna hi a nasa a, kaidarh a awlsam a, thi zat an pung a, chhungkua a fan a, Sorkar pawh a hma aia nasa in a tal buai thei a, nang leh kei, kan tu leh fate zirna thlengin a la tuar zawk thei tih hria in kan zawm theih chinah fimkhur tawk awmlo khawpin i fimkhur ang u.